काठमाडौ २२ माघ ।
प्रदेश नम्बर १ र ४ को पहिलो प्रदेश सभा बैठक आज बस्दैछ । प्रदेश नम्बर १ को विराटनगर र प्रदेश नम्बर ४ को पोखरामा बैठक बस्ने तयारी छ ।
दुवै प्रदेशमा अन्तरिम कार्यविधि पारित गरी सभामुख तथा उपसभामुखको निर्वाचन मिति तय गर्ने पहिलो कार्यसुची रहेको जनाइएको छ ।
विराटनगरस्थित जिल्ला समन्वय समितिको भवनमा दिउँसो १ बजे बस्ने प्रदेश नम्बर १ को बैठकको अध्यक्षता जेष्ठ सदस्य ओमप्रकाश सरावगी ले गर्नुहुनेछ ।
९३ जना सांसद रहेको प्रदेश एकमा एमालेको ५१, कांग्रेसको २१, माओवादीको १५, संघिय समाजवादी फोरमका ३ तथा राष्ट्रिय प्रजातन्त्र पार्टी राप्रपा, संघिय गणतान्त्रिक राष्ट्रिय मन्च र स्वतन्त्रबाट एक एक जना सदस्य रहेका छन् ।
यस्तै प्रदेश नम्बर चारको बैठक बिहान ११ बजेपछि पोखरामा सुरु हुनेछ । बैठकका लागि सबै सांसद पोखरा पुगिसकेको ४ नम्बर प्रदेश संसद सचिवालयले जनाएको छ । बैठकको अध्यक्षता जेष्ठ सदस्य जनकलाल श्रेष्ठले गर्नुहुनेछ ।
५९ जना कूल सदस्य रहेको प्रदेश नम्बर ४ मा एमाले २७, कांग्रेसका १५, माओवादीका १२, राष्ट्रिय जनमोर्चका ३ तथा नयाँ शक्तिका २ जना सदस्य रहेका छन् । यसअघि हिजो प्रदेश नम्बर २, ५, ५ र ७ मा प्रदेश सभाको पहिलो बैठक बसेको थियो ।
प्रदेश नम्बर ३ को भने गत माघ १८ गते नै पहिलो बैठक बसिसकेको छ । आजको बैठकसँगै सबै प्रदेश संघियता अभ्यासको बाटोमा औपचारिक रुपमा प्रवेश गर्नेछन् ।
