रुपन्देही, माघ १७ ।
नेपाली कांग्रेसका केन्द्रीय सदस्य एवं पूर्व स्वास्थ्य मन्त्री गगनकुमार थापाले एमालेको नेतृत्वमा समृद्धिको सपना देख्नु भ्रम मात्रै भएको बताउनु भएको छ ।
नेपाली कांग्रेस बुटवल उप–महानगर समितिले आज बुटवलमा आयोजना गरेको कार्यकर्ता भेलालाई सम्वोधन गर्दै उहाँले एमाले प्राइभेट कम्पनी जस्तै भएकाले माओवादी केन्द्र मिसिएर पनि तात्वीक फरक नपर्ने बताउनु भएको हो ।
माक्सवाद , लेनिनवाद र माओवादीका झण्डा खोलेर डमरु बजाउदै एमाले माओवादीहरु कांग्रेस कै बाटोमा आएको उहाँको दाबी छ । कांग्रेसले राजनीति जितेको भए पनि चुनाव हारेको भन्दै पुरानो ढर्रा र सोचबाट पार्टी अगाडी बढ्न नसक्ने बताउनुभयो ।
पार्टीलाई पुर्नजीवन दिन र पाँच वर्षपछि कांग्रेसलाई पहिलो पार्टी बनाउने अभियानमा आफूहरु लागेको बताउदै नेता थापाले पुराना नेताहरुले नयाँ युगको नेतृत्व गर्न नसक्ने बताउनु भयो ।
