काठमाडौं,८ माघ । नेपाली कांग्रेसका वरिष्ठ नेता रामचन्द्र पौडेल पक्षका जिल्ला सभापतिहरुको भेलाले महासमिति बैठक तत्काल बोलाउन माग गरेको छ ।
खोटाङको हलेसीमा आज सम्पन्न भेलाले महासमिति बैठक र सभापतिहरुको राष्ट्रिय भेला तत्काल बोलाउन नेतृत्वसमक्ष माग गर्ने निर्णय गरेको सिन्धुपाल्चोकका कांग्रेस सभापति विकास लामाले जानकारी दिनुभयो ।
विधानअनुसार पार्टी चलाउनका लागि पनि राष्ट्रिय भेला र महासमिति बैठक आवश्यक रहेको भेलाको निश्कर्ष छ ।
भेलामा सिँचाइमन्त्री सञ्जय गौतम, सिँचाइ राज्यमन्त्री अमरसिंह पुन, नुवाकोटका जगदीश्वरनरसिंह केसी, भक्तपुरका दुर्लभ थापा, सिन्धुपाल्चोकका कांग्रेस सभापति लामालगायत ३५ जिल्लाका पार्टी सभापति सहभागी थिए।
भेलामा सहभागी सभापतिहरुले भूकम्पपीडितलाई सरकारले वेवास्ता गरेको भन्दै राहत बढाउनसमेत माग गरेको छ।
यसअघि पौडेल पक्षका जिल्ला सभापतिहरुले सिन्धुपाल्चोकको मेलम्चीमा गोप्य भेला राखेका थिए। त्यही भेलाबाट हलेसीको बैठक तय भएको थियो।
