दाङ, माघ २ ।
दाङलाई प्रदेशको अस्थायी मुकाम तोक्न माग गर्दै आजदेखि अनिश्चितकालिन जिल्ला बन्दको घोषणा गरिएको छ ।
दाङमा प्रदेश प्रहरी कार्यालय, उच्च अदालत आदि स्थापना भइसकेको पछिल्लो समयमा अन्यत्रै मुकाम तोक्ने तयारी गरिएको भन्दै स्थानीयवासीले आन्दोलन शुरु गरेका हुन् ।
दाङलाई प्रादेशिक राजधानी नतोकिएसम्म अनिश्चितकालिन बन्दको घोषणा गरिएको दाङ प्रादेशिक राजधानी सरोकार समितिले जनाएको छ ।
आन्दोलनमा जिल्लाका सम्पुर्ण राजनीतिक दलहरु, उद्योग बाणिज्य संघ, नागरिक समाज र विभिन्न सामाजिक संघसंस्थाहरुको एकैबद्धता छ ।
दाङको भालुवाङ, लमही, घोराही, नारायणपुर, बिजौरी र तुलसीपुरमा स्थानीय उद्योग बाणिज्य संघको समन्वयमा आजदेखि अनिश्चितकालिन बन्दको घोषणा गरिएको समितिका संयोजक नारायणप्रसाद भुषालले जानकारी दिनुभयो ।
बन्दका कारण पुर्वपश्चिम राजमार्ग अन्तर्गत दाङ खण्ड पुरै ठप्प छ भने जिल्लाभर सवारी साधन सन्चालनमा आउन सकेको छैन । बिद्यालय तथा कलकारखाना पनि ठप्प छ ।
दाङलाई राजधानी नतोकिएसम्म बन्द नखोलिने बताइएको छ । साथै आज बिहान ८ बजे घोराहीमा विशाल जनप्रदर्शनको आयोजना गरिएको छ ।
सरकारको निर्णयप्रति असहमति जनाउँदै विरोध प्रदर्शनका लागि स्थानीयहरु सडकमा उत्रिएका छन् ।
