काठमाडौँ , ३ माघ ।
प्रदेश प्रमुख र अस्थायी मुकाम तोक्ने तयारी स्वरुप आज मन्त्रीपरिषदको बैठक बस्दै छ ।
राजनितिक दलबीचको असहमतीका कारण हिजो बोलाईएको बैठक आजका लागी सारिएको हो ।
आज बिहान ९ बजे बस्ने बैठकमा प्रदेश अस्थायी मुकाम तोक्न र प्रदेश प्रमुख नियुक्त गर्ने मुख्य एजेण्डामा छलफल गरि निर्णय लिने कानुनमन्त्री यज्ञबहादुर थापाले जानकारी दिनुभयो ।
तीन सातायताको सरकारको कसरत असफल हुँदै आएकाले आजपनि बैठकले उक्त निर्णय गर्नेमा भने आशंका छ ।
प्रधानमन्त्री शेरबहादुर देउवाले राजनीतिक सहमतिका आधारमा प्रदेश प्रमुख र अस्थायी राजधानी तोक्ने बताउँदै आए पनि दलीय सहमति जुट्न सकिरहेको छैन ।
प्रदेश प्रमुख नियुक्ति हुन नसक्दा निर्वाचन आयोगले तयार पारिसकेको प्रदेशसभाको समानुपातिक परिणाम दिन सकेको छैन ।
प्रदेशसभाको परिणाम प्रदेश प्रमुखलाई नबुझाई त्यसले वैधानिकता नपाउने र प्रदेशसभा सदस्यहरू तय नभएसम्म राष्ट्रिय सभाको मतदाता नामावली समेत तयार नहुने भएकाले पनि सरकारलाई दबाब बढेको छ ।
