काठमाडौं, माघ १० । सरकारले प्रदेशको अस्थायी राजधानी तोक्ने र प्रदेश प्रमुख नियुक्त गर्ने तयारी गरेको छ ।
प्रधानमन्त्री शेरबहादुर देउवाले प्रदेशको अस्थायी राजधानी तोक्न र प्रदेश प्रमुख नियुक्तिको सिफारिस गर्न आजै दिउँसो ४ बजे मन्त्रिपरिषद्को बैठक बोलाएका छन् ।
प्रदेश प्रमुख र प्रदेशको अस्थायी कार्यालय तोक्ने सबै तयारी पूरा भएकाले मन्त्रिपरिषद्को बैठक बोलाइएको प्रधानमन्त्रीको सचिवालयले जनाएको छ ।
सरकारले प्रदेश प्रमुख नतोक्दा निर्वाचन आयोगले प्रदेशसभातर्फको समानुपातिक तर्फको निर्वाचन परिणाम बुझाउन पाएको छैन ।प्रदेशको अस्थाई राजधानी तोक्दा आन्दोलन चर्कन सक्ने देखेपछि सरकारले कार्यसञ्चालनका लागि अस्थाई कार्यालय मात्र तोक्न लागेको हो ।
सरकारले उच्च अदालत भएका ठाउँमा अस्थाई कार्यालय तोक्ने छ । सरकारले प्रदेश नं १ को विराटनगर (मोरङ), प्रदेश २ नं को जनकपुर (धनुषा), प्रदेश नं ३ को पाटन (ललितपुर), प्रदेश नं ४ को पोखरा (कास्की), प्रदेश नं ५ को तुलसीपुर (दाङ), प्रदेश नं ६ को सुर्खेत र प्रदेश नं ७ को दीपालयमा उच्च अदालत राख्ने निर्णय गरेको छ । प्रदेश सभाले राजधानी नतोक्दासम्म अव त्यही अनुसार प्रदेशका अस्थाई केन्द्र रहने छन् ।
