काठमाण्डौ ,पुस २५ ।
राष्ट्रिय सभा सदस्यको निर्वाचन तालिका भोली सम्ममा सार्वजनिक गर्ने निर्वाचन आयोगले तयारी गरेको छ ।
आयोगका प्रवक्ता दिनेश घिमिरेका अनुसार सबै तयारी पुरा भएकाले भोली राष्ट्रिय सभा सदस्यको निर्वाचन तालिका सार्वजनिक हुने छ ।
सरकारले माघ २४ गते राष्ट्रिय सभा सदस्यको निर्वाचन गर्ने निर्णय गरिसकेको छ ।
यसैबीच ,निर्वाचन आयोगमा राष्ट्रियसभाको निर्वाचनका लागि अहिलेसम्म १० वटा राजनीतिक दलले दल दर्ता गरेका छन् ।
माघ २४ गते हुन लागेको निर्वाचनका लागि अहिलेसम्म १० वटा राजनीतिक दलले मात्र दल दर्ता गरेको आयोगका कानून तथा राजनीतिक दल सम्बन्ध महाशाखाका शाखा अधिकृत धर्मचन्द्र तिमिल्सेनाले जानकारी गराउनुभयो ।
ठूला पार्टी नेकपा (एमाले) र नेकपा (माओवादी केन्द्र) सहित मधेशवादी दलले पनि अझै दल दर्ता गराएका छैनन् । उहाँका अनुसार नेपाली काँग्रेस, राष्ट्रिय जनमोर्चा, नेपाल संघीय समाजवादी पार्टी, नेपाल मजदुर किसान पार्टी, बहुजन शक्ति पार्टी, नेपाल परिवार दल, नेपाल नौलो जनवादी, राष्ट्रिय प्रजातन्त्र पार्टी (प्रजातन्त्रवादी) र विवेकशील साझा पार्टीले दल दर्ता गरेका छन् ।
आयोगले यही पुस १४ देखि २८ गतेसम्म राष्ट्रियसभाको निर्वाचनका लागि राजनीतिक दललाई दल दर्ताको समय दिएको हो । राष्ट्रियसभामा प्रत्येक प्रदेशबाट आठ जनाका दरले ५६ जना निर्वा्चित हुनेछन् ।
