काठमाडौं,१८ पुस । नयाँ शक्ति पार्टीको बिस्तारित बैठक मंगलबारदेखी तीन दिनसम्म कास्कीमा बस्दैछ ।
नयाँ शक्तिका संयोजक बाबुराम भट्टराईले कास्कीमा तीन दिनसम्म पार्टीको शल्यक्रिया गर्ने बताएका छन । निर्वाचनपछि पहिलो पटक बस्न लागेको पार्टीको बिस्तारित बैठकलाई लिएर संयोजक भट्टराईले यस्तो भनेका हुन ।
भट्टराईले आफ्नो फेसबुक पेजमा लेखेका छन, ‘बैठकलाई परम्परागत ढाँचा भन्दा फरक ढंगले सन्चालन गर्दै तीन दिनसम्म आफ्नै निर्मम शल्यक्रिया गरिनेछ र देशमा सच्चा वैकल्पिक राजनीतिक शक्ति निर्माणको अभियानलाई नयाँ र अरू तीब्र ढंगले अघि बढाइनेछ ।’ प्रतिनिधिसभा र प्रदेशसभा निर्वाचनमा नयाँ शक्तिले राम्रो नतिजा ल्याउन नसकेपछि भावि रणनीति बनाउन महाधिवेशन आयोजक समितिको बैठक बोलाएको हो । बैठकमा केन्द्रीय कार्यकारी समिति, संरक्षक परिषद र विज्ञ परिषदका गरी करिब २०० जना सहभागी हुने सो पार्टीले जनाएको छ । निर्वाचनमा नयाँ शक्तिबाट प्रतिनिधिसभामा भट्टराई र प्रदेशसभामा प्रत्यक्षतर्फ २ जना र समानुपातिकमा १ जना बिजयी भएका छन ।
