१४ पुस, काठमाडौं ।
नेकपा एमालेका अध्यक्ष केपी शर्मा ओलीले सरकारको दबाबमा राष्ट्रपति विद्यादेवी भण्डारीले संविधानको मर्म्विपरीतको राष्ट्रियसभा निर्वाचनसम्वन्धी अध्यादेश जारी गरेको बताउनु भएको छ ।
एमाले मुख्यालय धुम्बाराहिमा आज आयोजित एक कार्यक्रममा बोल्दै अध्यक्ष ओलीले अध्यादेश नै अलोकतान्त्रिक तरिकाबाट ल्याइएको जिकिर गर्नुभयो ।
आफूले भनेकै हुनुपर्ने नेपाली कांग्रेसको जिद्दीका कारण यो अवस्था आएको उहाँको आरोप थियो । उहाँले भन्नुभयो , राष्ट्रपतिले अध्यादेश जारी गर्नु असंवैधानिक होईन तर यो अनुचित ढंगबाट चौतर्फि दबाबपछि आएकोले हाम्रो असहमति छ ।
एकल संक्रमणीय मत प्रणाली अहिले पूर्ण रुपमा लागू हुन नसक्ने भन्दै उहाँले अध्यादेशमा प्रस्तावित व्यवस्थाको विरोध गर्नुभयो ।
ओलीले आफूले कांग्रेस नेताहरुलाई केही सिट चाहिएको भए कुरा गरौैं भनेको पनि खुलासा गर्नुभयो । एमाले अध्यक्ष ओलीले अहिले पनि सरकार बन्न नदिने खेल भइरहेको पनि बताउनु भयो ।
सरकारले देशको अर्थतन्त्रलाई धरापमा पार्ने किसिमले जथाभावी पैसा बाँडेको र मनपरीरुपमा आफन्तहरुलाई विभिन्न निकायमा नियुक्त गरिरहेको भन्दै उनले आक्रोशसमेत पोख्नुभयो ।
