श्रीनगर, ९ असार ।
भारत अधिनस्थ काश्मिरमा रहेको एक मस्जिदको बाहिर गस्तीमा रहेका एकजना प्रहरी अधिकारीलाई आक्रोशित भीडले कुटेर हत्या गरेको छ ।
मारिनेमा मोहमद आयुब पान्डित नामका प्रहरी अधिकारी रहेको भारतीय प्रहरी स्रोतले जनाएको छ ।
प्रहरीे नै मारिएपछि विवादित सो क्षेत्रमा तनाव झन बढेको छ । कैयौँको सङ्ख्यामा आएका व्यक्तिको कुटाईबाट ती प्रहरी अधिकारीको ज्यान गएको भारतीय सन्चार माध्यमले जनाएका छन् ।
यसअघि केही समययतादेखि जारी रहेको हिंसाबीच आज भएको यस घटनाले थप तनाव बढाएको छ । पछिल्लो समय पहाडी क्षेत्रमा सुरक्षाबल र सर्वसाधारणबीच नै झडप सुरु भएको छ ।
प्रहरीद्वारा जारी विज्ञप्तिमा राज्य प्रहरी सञ्जालका उप निरीक्षक पन्डितको उत्तेजित भिडको आक्रमणको कारण हत्या भएको जनाइएको छ । आफ्नो कर्तव्य पालनाकै क्रममा उनको मृत्यु भएको प्रकाशित विज्ञप्तिमा जनाइएको छ ।
सन् १९४७ मा बेलायतको उपनिवेशबाट मुक्त भएपछि विभाजन भएका भारत पाकिस्तान दुबैले काश्मिर क्षेत्रलाई आफ्नो भूभागका रुपमा दावी गर्दै आएका छन् ।
