एजेन्सी, बैशाख २४ ।
इस्लामिक उग्रवादी समूह बोको हरामद्वारा अपहरित नाइजेरियाको एक विद्यालयका कम्तीमा ८२ बालिकालाई अपहरणमुक्त गरिएको छ ।
सन् २०१४ मा उत्तरपूर्वी नगर चिबोकको एउटा निजी विद्यालयबाट अपहरण गरिएका २७० विद्यार्थीमध्ये ८२ जना अपहरणमुक्त भएका हुन् ।
नाइजेरिया सरकार र बोको हरामका प्रतिनिधिका बीचमा वार्ता चलिरहेका बेला बालिका अपहरणमुक्त भएको सरकारी अधिकारीले जानकारी दिएका छन् ।
रातको समय पारेर गरिएको उक्त अपहरणको अन्तराष्ट्रिय क्षेत्रबाट चर्को आलोचना भएको थियो ।राष्ट्रपति बुहारीले सरकारले निरन्तर वार्ता गरिरहेको र अपहरण गरिएका बालिकालाई सुरक्षितरूपमा रिहा गराइ छाड्ने अघिल्लो महिना बताएका थिए ।
उनले अरू बालिकाको बारेमा पनि आशा नमार्न उनीहरूका बाबुआमालाई आग्रह गरेका छन् । सन् २०१६ को अक्टोबरमा पनि २१ जना बालिकालाई अपहरणमुक्त गराइएको थियो ।
सन् २००९ बाट बोको हरामले नाइजेरियामा द्वन्द्व सुरु गरेदेखि अहिलेसम्म करिब २० हजारभन्दा बढी मारिएका छन् भने लाखौँ मानिस विस्थापित भएका छन् ।
अपहरण गरिएका अधिकांश बालिका इसाई धर्मावलम्बी थिए । उनीहरूलाई इस्लाम धर्मावलम्बी बन्न र बोको हरामका सदस्यसँग बिहे गर्न दबाब दिइएको थियो ।
