एजेन्सी, बैशाख ४ ।
टर्कीमा गरिएको जनमत संग्रहमा कार्यकारी राष्ट्रपति प्रणालीको पक्षमा रहेका राष्ट्रपति रिसेप तैयप अर्दोगानले बहुमत प्राप्त गरेका छन् । संसदीय व्यवस्था विस्थापन गरी कार्यकारी राष्ट्रपति शासनको पक्षमा ५१ दशमलव ३७ प्रतिशत तथा विपक्षमा ४८ दशमलव ६३ प्रतिशत मत प्राप्त गरेको छ ।
योसँगै रिसेप तैयप अर्दोगान सन् २०२९ सम्म राष्ट्रपति हुन सक्ने स्थानीय सञ्चार माध्यमले जनाएको छ । उक्त जनमत संग्रहमा ८५ प्रतिशत मत खसेको बताएको छ ।
अर्दोगानका समर्थकहरूले राष्ट्रपति शासनबाट अब आफ्नो मुलुकमा आधुनिकीकरणसहित विकास हुनेमा दाबी गरिरहेका छन् भने विरोधीहरूले निरंकुशता स्थापित गर्ने चालबाजीमा रहेका छन् ।
विपक्षी दलले यस निर्णयलाई चुनौतीको सामना गर्ने बताएका छन् । उनीहरूले मतगणना पुनः गर्न मागसमेत गरेका छन् । अब राष्ट्रपति एक्लैले मन्त्रीहरू नियुक्त गर्ने, फैसला जारी गर्ने, वरिष्ठ न्यायाधीश चुन्ने र संसद् भङ्ग गर्ने अधिकारसमेत पाउने भएका छन् ।
योसँगै टर्कीमा प्रधानमन्त्रीको पद हटाइने छ भने देशमा रहेका सम्पूर्ण कर्मचारीसहितको सारा शक्ति राष्ट्रपतिको हातमा रहने व्यवस्था रहेको छ ।
अर्दोगानले अब मुलुकमा फ्रान्स र अमेरिकासँग मिल्दोजुल्दो हुने गरी प्रणाली लागू गर्ने र कुर्द विद्रोह अन्त्य गर्ने, इस्लामिक अतिवाद हटाउने तथा सिरियाबाट आउने शरणार्थीसमेत व्यवस्थापन गर्ने जस्ता विषयमा निर्णय लिन सजिलो हुने बताए ।
अर्दोगान टर्कीमा एक दशकसम्म प्रधानमन्त्री भएपछि सन् २०१४ मा राष्ट्रपति बनेका थिए ।
