एजेन्सी, बैशाख ३ ।
उत्तर कोरियाले अमेरिकालाई आक्रमणका लागि चेतावनी दिँदै आफ्नो पूर्वी तटीय क्षेत्रमा गरिएकोे आणविक मिसाइल परीक्षण असफल भएको छ । दक्षिण कोरियाले उक्त मिसाइल परीक्षण असफल भएपछि सोबारे विस्तृत छलफललाई व्यापकता दिएको छ । उत्तर कोरियाद्वारा एउटा ब्यालेस्टिक मिसाइल परीक्षण गर्दागर्दै केही सेकेण्डमा नै विष्फोट भएको अमेरिकाले जनाएको छ ।
अमेरिकाले आफ्ना सैनिकहरूलाई उत्तर कोरियाली प्रायद्वीपबाट फिर्ता नगरे अमेरिकाविरुद्ध आणविक आक्रमण गर्न तयार रहेको भन्दै उत्तर कोरियाले अमेरिकालाई चेतावनीसमेत दिएको थियो ।
आफ्ना संस्थापक नेता किम इल सङको एक सय पाँचौँ जन्म जयन्तीको अवसर पारेर उत्तर कोरियाले शनिबार सेना तथा ट्याङ्करलगायत अन्य सैनिक उपकरणसहित प्योङयाङमा सैनिक परेडमार्फत शक्ति प्रदर्शन गरेको थियो ।
संयुक्त राष्ट्र संघले उत्तर कोरियामाथी कुनै पनि प्रकारको आणविक परीक्षण गर्न प्रतिबन्ध लगाए पनि उत्तर कोरियाले केही समय अघिदेखि पाँच वटा आणविक मिसाइल श्रृंखलाबद्ध रूपमा परीक्षण गर्दै आएको छ ।
