एजेन्सी, चैत्र ३१ ।
पाकिस्तानको एबोटाबादमा आतंकवादी संगठन ‘अल कायदा’ का तत्कालीन प्रमुख ओसामा विन लादेनविरुद्धको सैन्य कारबाहीमा संलग्न रहेका अमेरिकी सेनाको विशेष टोली दक्षिण कोरियामा पुगेको छ ।
उत्तर कोरियाको परमाणु कार्यक्रम र शक्ति प्रदर्शनपछि अमेरिकाले सुरक्षात्मक कारबाही अघि बढाइरहेको समयमा अमेरिकी सैन्य टोली दक्षिण कोरियातर्फ पुगेको हो । अमेरिकी सेनाको सो टोलीले दक्षिण कोरियाली सेनासँग संयुक्त सैन्य अभ्यास गर्ने बताइएको छ ।
दक्षिण कोरियाली रक्षा मन्त्रालयकाअनुसार उत्तर कोरियाद्वारा गरिँदै आएको भड्काउपूर्ण गतिविधि नियन्त्रणमा अमेरिका र दक्षिण कोरियाले सहकार्य जारी राख्ने छन् ।
उल्लेखनीय छ, अमेरिकी नेभी सिलको समूहले सन् २०११ मा पाकिस्तानको एबोटाबादमा लादेन बस्दै आएको घरलाई घेरेर सैन्य अप्रेशन गरेको थियो । अकस्मात गरिएको सो कारबाहीमा लादेन मारिएका थिए भने पाकिस्तानले समेत उक्त अप्रेशनको पूर्वजानकारी पाएको थिएन ।
