एजेन्सी, चैत्र २९ ।
अमेरिकाले उत्तर कोरियाली प्रायद्वीपमा युद्धपोत जहाज तैनाथ गरेपछि उत्तर कोरियाले पनि अमेरिकासँग युद्ध गर्न तयार रहेको जनाएको छ ।
उत्तर कोरियाले बनाएको शक्तिशाली हतियारको सुरक्षा आफ्नै देशले गर्न सक्ने विदेश मन्त्रालयका प्रवक्ताले उत्तर कोरियाली सरकारी समाचार एजेन्सीलाई जनाएका छन् ।
उत्तर कोरियाली विदेश मन्त्रालयका प्रवक्ताकाअनुसार उत्तर कोरियाले जस्तोसुकै चुनौतीको सामना गर्न तयार रहेको जनाएको छ । उत्तर कोरियाले तयार गरेको आणविक हतियारको खतरासँग सामना गर्न अमेरिका एक्लै तयार रहेको अमेरिकी राष्ट्रपति ट्रम्पले बताएका छन् ।
उत्तर कोरियालाई थप अरू मिसाइल परीक्षण नगर्न दक्षिण कोरिया र चीनले पनि चेतावनी दिइसकेको छ । अमेरिकाले आफ्नो हितको रक्षा गर्न तथा क्षेत्रीय शान्तिका लागि भन्दै उत्तर कोरियाली प्रायदीपमा युद्धपोत जहाज तयारी अवस्थामा राखेको हो ।
