एजेन्सी, चैत्र २८ ।
भारतको प्रशासित क्षेत्र काश्मीरमा उप–निर्वाचनको क्रममा झडप हुँदा आठ जनाको ज्यान गएको छ । त्यस क्षेत्रमा श्रीनगर लोकसभाको लागि मतदान जारी रहँदा मतदान केन्द्रमा हिंसात्मक प्रदर्शनसमेत भएको थियो ।
उप–निर्वाचनमा ६ दशमलव ५ प्रतिशत मात्र मत खसेको स्थानीय अधिकारीहरूले जनाएका छन् । घटनालगत्तै पृथकतावादी नेताहरूले निर्वाचन बहिष्कारको आव्हान गरेका थिए ।
भारत सरकारले मतदानका लागि २० हजार सेना थप परिचालन गरेको थियो भने शान्तिपूर्ण निर्वाचन गर्नका लागि इन्टरनेट सेवासमेत बन्द गराएको थियो । मुस्लिमहरूको बाहुल्यता रहेको काश्मीरमा भारत र पाकिस्तानबीच दशकौँदेखि पुरानो विवादको केन्द्र बन्दै आएको छ ।
पाकिस्तानले पृथकतावादी समूहलाई सहयोग गरेको भारतले आरोप लगाएको छ भने इस्लामावादले यसलाई अस्वीकार गर्दै आएको छ । दुबै मुलुकले काश्मीरलाई आफ्नो भू–भाग भनेर दाबी गर्दै आइरहेको छ ।
