एजेन्सी १४ चैत्र ।
राष्ट्रसंघीय सुरक्षा परिषदले विश्वव्यापी रुपमा आणविक हतियारमा प्रतिबन्ध लगाउने सम्बन्धमा छलफल गर्न बोलाएको बैठक राष्ट्रसंघ सुरक्षा परिषदका स्थायी सदस्य सहित झण्डै ४० देशले बहिस्कार गरेका छन् ।
अमेरिका, बेलायत, फ्रान्स लगायत ४० देशले विश्वव्यापी रुपमा आणविक हतियारमा प्रतिबन्ध लगाउने सम्बन्धमा छलफल गर्न बोलाएको बैठक बहिष्कार गरेको अन्तर्राष्ट्रिय सन्चार माध्यमले जनाएका छन् ।
अन्य एक सय २० भन्दा धेरै देश भने प्रस्तावको पक्षमा छन् । गत अक्टोबरमा राष्ट्रसंघको एक सम्मेलनमा परमाणु हतियारमा कानुनी रोक लगाउने सन्धिमा वार्ता गर्ने घोषणा गरिएको थियो ।
चीन, भारत र पाकिस्तानले समेत वार्ताको विपक्षमा मतदान गरेका थिए । त्यस्तै सन् १९४५ मा आणविक आक्रमण झेलेको एक मात्र देश जापानले समेत वार्ताको विरुद्धमा मतदान गरेको थियो ।
यसैबिच राष्ट्रसंघका लागि अमेरिकी राजदुत निकी हेलीले परमाणु हतियारमाथि विश्वव्यापी प्रतिबन्ध लगाउनु उचित कदम नभएको टिप्पणी गर्नुभएको छ । राष्ट्रिय सुरक्षाका लागि परमाणु हतियार आवश्यक रहेको राजदुत हेलीको भनाई छ ।
सबैले परमाणु हतियार बिहीन विश्वको चाहना गर्ने भएपनि उत्तर कोरिया जस्ता देशका कारण यो आवश्यक रहेको उहाँको दाबी छ । उत्तर कोरियाले पछिल्लो समय लगातार विभिन्न क्षमताका परमाणु हतियार तथा मिसाइल परीक्षण गर्दै आएको छ ।
