लन्डन, १० चैत । बेलायतको राजधानी लन्डनमा बुधवार भएको आक्रमण इस्लामिक स्टेट (आईएस) ले आफ्नो समूहद्वारा गराएको भनी जिम्मेवारी लिएको छ ।
आईएसको निकट मानिने अमास न्युज एजेन्सीमार्फत् उक्त समूहले अाज(बिहीबार)आक्रमणको जिम्मेवारी लिएको हो ।
अमास न्युज एजेन्सीको ट्वीटर पेजमा एक सन्देश जारी गर्दै भनिएको छ, “आईएसका एक सिपाहीले बेलायती संसदमा भएको आक्रमण गराएका र आक्रमण गठबन्धन राज्यका मानिसलाई लक्षित गरिएको थियो ।”
सन्देशमा व्यक्त भावअनुसार आक्रमणकारीलाई आईएसद्वारा प्रोत्साहित गरिएको र प्रत्यक्ष रुपमा आक्रमणको तालिम दिएको स्काई न्युजले जनाएको छ ।
यसैबीच बेलायती प्रधानमन्त्री थेरेसा मेले अाज संसदलाई सम्बोधन गर्दै आक्रमणकारी बेलायती मूलका एक व्यक्ति भएको र उसका बारेमा प्रहरी र सुरक्षा सेवामा कार्यरत अधिकारीलाई जानकारी रहेको बताउनुभएको छ ।
प्रधानमन्त्रीले आक्रमणकारी बेलायती सुरक्षा सेवाद्वा हिंसात्मक आतङ्कवादी आक्रमण गराउन सक्ने भनी सुरक्षा अधिकारीबाट विगतमा गरिएका अनुसन्धानमा ल्याइएका व्यक्ति भएको बताउनुभयो ।
