एजेन्सी १४ फागुन । अमेरिकी राष्ट्रपति डोनाल्ड ट्रम्पले अवैध आप्रवासी प्रवेशमा रोक लगाउन भन्दै मेक्सिकोसँगको सीमामा बनाउने भनिएको पर्खाल निर्माण कार्य निर्धारित समय भन्दा पहिले नै सुरु हुने बताउनु भएको छ ।
कन्जरभेटिभ पार्टीको मेरिल्याण्डमा भएको सम्मेलनलाई सम्बोधन गर्दै राष्ट्रपति ट्रम्पले मेक्सिको सँगको सीमा पार गर्न नसकिने गरी पर्खालको निर्माण चाँडै नै सुरु हुने बताउनु भएको अन्तर्राष्ट्रिय सन्चार माध्यमहरुले जनाएका छन् ।
आफ्नो नितिमा जहिलेपनि अमेरिकी नागरिकलाई पहिलो प्राथमिकतामा राख्ने भन्दै ट्रम्पले इस्लामिक स्टेट आइएसलाई पूर्ण रुपमा परास्त गर्ने गरी रणनिति तय भइरहेको बताउनुभयो ।
अमेरिकी विदेश मन्त्री रेक्स टिल्लर्सन र होमल्याण्ड सुरक्षा मन्त्री जोन केलीले आफ्ना मेक्सिकन समकक्षीसँग भेट गरेको एक दिनपछि ट्रम्पको यस्तो भनाई आएको हो ।
मेक्सिकोसँगको सीमामा बनाउने भनिएको पर्खाल निर्माणका लागि २१ अर्ब ५० करोड अमेरिकी डलर भन्दा धेरै लाग्ने होमल्याण्ड सुरक्षा मन्त्रालयको आन्तरिक प्रतिवेदनलाई उल्लेख गर्दै अन्तर्राष्ट्रिय समाचार संस्था रोयटर्सले जनाएको छ ।
