एजेन्सी,फागुन ९।
सोमालियाको राजधानी मोगादिशुमा आत्मघाती कार बम विस्फोट हुँदा ३९ जनाको मृत्यु भएको छ । घटनामा ५० जना घाइते भएका छन् ।
मोगादिशुको दक्षिणी क्षेत्रमा अवस्थित खाद्यान्न तथा तरकारीको व्यस्त बजारमा विस्फोट भएको अन्तराष्ट्रिय सञ्चार माध्यमले जनाएका छन् । विस्फोटका कारण बजार ध्वस्त भएको छ ।
फेब्रुअरीको सुरुमा भएको राष्ट्रपतीय चुनावमा मोहम्मद हब्दुल्लाही मोहम्मद विजयी भएपछि राजधानी मोगादिशुमा भएको यो ठूलो आक्रमण हो । आक्रमणको अहिलेसम्म कुनै पनि समूहले जिम्मा लिएको छैन ।
तर बिद्रोही समूह अल–शबाबले आक्रमण गरेको हुनसक्ने आशंका रहेको बिबिसीले जनाएको छ । शनिबार अल–शबाबका एक उच्च नेताले राष्ट्रपतिका समर्थकलाई लक्षित गरी ठूलो आक्रमण गर्ने बताएका थिए ।
नयाँ राष्ट्रपतिको समर्थन गर्ने सबै राक्षसी मानसिकता भएका मानिस रहेको आरोप लगाउँदै अल–शबाबका नेता शेख हसन याकुबले ति सबै आक्रमणको खतरामा रहेको बताउनु भएको थियो ।
राष्ट्रपति मोहम्मदले आक्रमणको निन्दा गर्नु भएको छ । उहाँले आक्रमणकारीका बारेमा सूचना दिनेलाई एक लाख अमेरिकी डलर पुरस्कार दिने घोषणा समेत गर्नुभएको छ ।
