एजेन्सी फागुन ४।
भारतमा पनि वायु प्रदुषणको मात्रा निकै बढेर चीनको जस्तै अवस्थामा पुग्न लागेको अमेरिकाको हेल्थ इफेक्ट्स इन्स्टिच्युटले जनाएको छ ।
हेल्थ इफेक्ट्सले गरेको नयाँ अध्ययनमा वायु प्रदुषणका कारण भारतको हावा विषाक्त बन्दै गएको देखाएको छ । यही विषालु हावा तथा प्रदुषणका कारण भारतमा हरेक वर्ष १० लाख भन्दा धेरै मानिसको ज्यान जाने गरेको प्रतिवेदनमा उल्लेख गरिएको छ ।
हावामा रहेका सुक्ष्म कण सबैभन्दा खतरनाक हुने भएकाले यसले श्वासप्रश्वास सम्बन्धी रोग तथा फोक्सोको क्यान्सर हुने गरेको छ । प्रदुषणका कारण ज्यान गुमाउनेमा धेरैमा श्वासप्रश्वास सम्बन्धी रोग र फोक्सोको क्यान्सर देखिएको प्रतिवेदनमा उल्लेख छ ।
गत वर्ष विश्व स्वास्थ्य संगठन (डब्लुएचओ) ले निकालेको प्रतिवेदनमा भारतमा प्रदुषण स्वास्थ्यका लागि निकै ठूलो चुनौती बन्दै गएको र धेरैको यही कारण ज्यान गएको उल्लेख थियो । तर अहिले आएको हेल्थ इफेक्ट्सको प्रतिवेदनमा डब्लुएचओले बताए भन्दा धेरैको ज्यान प्रदुषणका कारण गएको उल्लेख छ ।
यसले समस्या थप जटिल बन्दै गएको देखिने सरोकारवालाले बताएका छन् । भारतमा वायु प्रदुषणको अवस्था झण्डै चीनमा जस्तै बन्दै गएको हेल्थ इफेक्ट्सले जनाएको हो ।
