एजेन्सी, माघ १९।
भारतीय संसदको संयुक्त अधिवेशन चलिरहेकै समयमा अचानक बेहोस भएर ढलेका एक सांसदको आज विहान निधन भएको छ ।
भारतको पूर्व विदेशराज्यमन्त्री समेत रहनु भएका ७८ वर्षीय सांसद ई अहमदको दिल्लीस्थित राम मनोहर लोहिया अस्पतालमा आज विहान निधन भएको हो ।
हिजो संसदको संयुक्त बैठकलाई भारतीय राष्ट्रपति प्रणव मुखर्जीले सम्बोधन गरिरहँदा सांसद ई अहमद आफ्नै सीटमा अचानक बेहोस हुनु भएको थियो ।
संसद परिसरमै प्राथमिक उपचारपछि उहाँलाई उपचारका लागि राम मनोहर लोहिया अस्पताल लगिएको थियो । उहाँको आज विहान लोहिया अस्पतालमा उपचारकै क्रममा निधन भएको भारतीय सञ्चारमाध्यमले जनाएका छन् ।
सांसद ई अहमद केलरको मल्लापुरम सीटबाट लोकसभा सदस्य निर्वा्चित हुनु भएको थियो । उहाँ इन्डियन मुस्लिम लिगका राष्ट्रिय अध्यक्ष हुनुहुथ्यो ।
मनमोहन सिंह नेतृत्वको युपिए सरकारमा विदेश राज्यमन्त्री समेत रहनु भएका उहाँले रेल राज्यमन्त्रीको जिम्मेवारी समेत सम्हाल्नु भएको थियो ।
