एजेन्सी , माघ १२ ।
अलेप्पो बालिकाको रुपमा चिनिएकी सात वर्षिय बालिका बना अलाबेदले सिरियाली बालबालिकालाई सहयोग गर्न अपिल गर्दै अमेरीकाका राष्ट्रपति ड्रोनाल्ड ट्रम्पलाई पत्र लेखेकी छिन् ।
गत डिसेम्बरमा द्धन्द्धग्रस्त अलेप्पोबाट स्थानीयलाई निकाल्ने क्रममा आफ्नो परिवारसँग टर्की पुगेकी अलाबेदले सिरियाली बालबालीका द्धन्दमा फसेको र उनीहरुलाई शान्ति चाहिएकोले सहयोग गर्न आग्रह गरेकी छिन् ।
अलाबेदले ट्रम्पलाई सिरियाली बालबालिका पनि उनका बालबालिका जस्तै भएको र शान्ति चाहेको लेखेकी छन् ।
अलाबेदले अलेप्पो अहिले मृत शहर जस्तै भएको र आफ्ना केही साथीहरु पनि मारिएको उल्लेख गरेकी छन् । सिरियाली बालबालिकाका लागि ट्रम्पले केही गर्ने बाचा गरे उनी आफ्नो नयां साथी हुने उनको पत्रमा उल्लेख छ ।
अमेरिकी राष्ट्रपति ट्रम्पले यसअघि नै रुसी राष्ट्रपति भ्लादिमिर पुटिनसंग मिलेर काम गर्ने बताइसकेका छन् ।
रुसले सिरियाली राष्ट्रपति बशार अल असादलाई समर्थन र सहयोग गर्दै आएको छ । असादको शासन विरुद्ध छ वर्ष यता चलेको गृहयुद्धका कारण सिरियामा ३ लाख भन्दा बढी मानिस मारिइसकेका छन् ।
अलाबेदले अलेप्पोबाट ट्वीट गरेका म्यासेजहरुपछि उनी विश्वभर अलेप्पो बालिकाका नामले परिचित बनेकी छन् ।
