एजेन्सी १२ माघ ।
गत नाभेम्बरमा सम्पन्न राष्ट्रपति निर्वाचनमा लाखौं गैरकानुनी मतदाताले मतदान गरेको ह्वाइट हाउसले जनाएको छ ।
ह्वाइट हाउसका मिडिया प्रवक्ता सिन स्पीसरले करिब ५० लाख मतदाताले बिना कागजात मतदान गरेको दावी गर्नुभएको छ । यद्यपी स्पीसरले यसबारेमा कुनै प्रमाण भने पेश गर्नुभएन ।
ट्रम्पलाई मत दिने भने वैध मतदाता भएको स्पीसरले बताउनु भयो । राष्ट्रपति डोनाल्ड ट्रम्पले राष्ट्रपतीय निर्वाचनमा दशौं लाख मतदाताले गैरकानुनी रुपमा मतदान गरेको आरोप लगाउनु भयो ।
नयाँ राष्ट्रपति डोनाल्ड ट्रम्पले जिम्मेवारी सम्हाले लगतै ह्वाइट हाउसले राष्ट्रपतीय निर्वाचनमा दशौं लाख गैरकानुनी मतदाताले मत दिएको अध्ययन तथा प्रमाणले देखाएको दाबी गरेको हो ।
पपुलर मतमा डेमोक्रेटिक उमेदवार हिलारी क्लिन्टन भन्दा पछि परेपछि ट्रम्पले निर्वाचनका क्रममा धाँधली भएको आरोप लगाउँदै आउनु भएको छ ।
तर उहाँको आरोपको यस अघि नै चुनाव आयोगले खण्डन गरिसकेको छ । राष्ट्रपतिको जिम्मेवारी सम्हालेपछि पनि प्रमाण बिना आरोप लगाएको भन्दै ट्रम्पको आलोचना भएको छ ।
