एजेन्सी, माघ ६ ।
अमेरिकी राष्ट्रपति बाराक ओबामाले रुसमाथि लगाइएको प्रतिबन्ध नहटाउन नवनिर्वा्चित राष्ट्रपति डोनाल्ड ट्रम्पलाई सल्लाह दिनु भएको छ ।
ह्वाइट हाउसबाट भोलिदेखि बाहिरीन लाग्नु भएको राष्टपति ओबामाले नवनिर्वाचित राष्टपति ट्रम्पलाई यस्तो सुझाव दिनु भएको हो ।
जबसम्म रुसले आफ्ना काममा सुधार गर्दैन तबसम्म रुस माथिको प्रतिबन्ध हटाउन नहुने उहाँको भनाई छ । यूक्रेनको सम्प्रभुता माथिको अतिक्रमण जस्ता अक्षम्य काम रुसबाट भएको ओबामाले बताउनु भयो ।
ह्वाइटहाउसमा आठ वर्ष बिताएपछि राष्ट्रपतिका रुपमा आफ्नो अन्तिम पत्रकार सम्मेलनमा ओबामाले भ्लादीमिर पुटिनले अमेरिकासँग शत्रुतापूर्ण सम्बन्ध कायम गरेको र यो शीत युद्ध जस्तै रहेको पनि उल्लेख गर्नु भयो ।
आफू नागरिकको स्वतन्त्रताको पक्षमा सधै आवाज उठाइ रहने पनि ओबामाले प्रष्ट पार्नु भएको छ । यस्तै नवनिर्वाचित राष्टपति ट्रम्पले भने भोली पद तथा गोपनीयताको शपथ लिदै हुनुहुन्छ ।
यद्यपी ५० जना सिनेटरले भने शपथ ग्रहण समारोह बहिष्कार गर्ने निर्णय गरेका छन् । ट्रम्पको अभिव्यक्ति र कार्यशैलीप्रति विरोध जनाउँदै डेमोक्रेटीक सिनेटरहरुले शपथ समारोह बहिष्कार गर्ने घोषणा गरेका हुन् ।
