काठमाडौ ११ पौष ।
प्यालेष्टाइनको सीमामा अवैध इजरायली बस्ती हटाउने प्रस्ताव पारित हुन नदिन अमेरिकाले भिटो प्रयोग नगरी मतदानमा समेत अनुपस्थित भएपछि इजरायल अमेरिकासँग रुष्ट बनेको छ ।
अमेरिकाको सहभागिता बिना संयुक्त राष्ट्रसंघ सुरक्षा परिषद्ले प्यालेष्टाइनको सीमामा अवैध इजरायली बस्ती हटाउने प्रस्ताव पारित गरेपछि दुई मुलुकबीचको सम्बन्ध थप चिसिएको हो ।
निर्णयबाट रुष्ट बन्नु भएका इजरायली प्रधानमन्त्री बेन्जामिन नेतन्याहुले यस विषयमा छलफलका लागि अमेरिकी राजदूत डेन शापिरोलाई अत्प्रयाशित रुपमा आफ्नो कार्यालयमा बोलाउनु भएको छ ।
विदेशमन्त्री समेत रहेका नेतन्याहुले शुक्रवार प्रस्तावको पक्षमा मतदान गरेका राष्ट्रका राजदूतहरुलाई यसअघि नै कार्यालयमा बोलाइसक्नु भएको छ ।
इजरायलले प्रस्ताव पारित हुनु लज्जास्पद भन्दै राष्ट्रसंघसँगको सम्बन्धको समीक्षा गर्ने पनि जनाएको छ । अमेरिका र इजरायललाई परम्परागत मित्र राष्ट्रका रुपमा हेर्ने गरिन्छ ।
सन् १९६७ मा इजरायलले पश्चिम किनारा र पूर्वी जेरुसेलम प्यालेस्टाइनबाट नियन्त्रणमा लिएको थियो । त्यसबेला देखि यि दुई क्षेत्रमा एक सय ४० बस्तीमा पाँच लाख यहुदी बस्दै आएका छन् ।
