एजेन्सी ,पुष २ ।
अमेरिकाले दक्षिणी चीन समुन्द्रबाट नियन्त्रणमा लिएको आफ्नो अन्डरवाटर ड्रोन फिर्ता गरिदिन चीनलाई औपचारिक आग्रह गरेको छ ।
गत बिहीबार चीनले अमेरिकाको अन्डरवाटर ड्रोन दक्षिणी चीनको सागरबाट नियन्त्रणमा लिएको थियो ।
सर्वेक्षण प्रयोजनको अमेरिकी यूएसएनएस बोडिच ड्रोन पानी जहाजको खोजीमा रहेको बेला चिनियाँ जल सेनाले नियन्त्रणमा लिएको अमेरीकी रक्षा मन्त्रालय पेन्टागनका प्रवत्ता क्याप्टेन जेफ डेविसले बताउनु भयो ।
ओसन ग्लाइडर नामक अन्डरवाटर ड्रोनले दिएको जानकारी पानीमुनिको सञ्जालको सीमांकनका लागि प्रयोग गरिने डेविसले बताउनुभयो ।
साथै सो ड्रोन पानीमा रहेको नुनिलोपना तथा तापक्रम पत्ता लगाउनका लागि प्रयोग गर्ने गरिएको थियो । मानवरहित अन्डरवाटर ड्रोन दक्षिणी चीन सागरमा वैध रुपमा सर्वेक्षणका लागि पठाएको र सो अमेरिकी सम्पत्ति भएकाले त्यसलाई हटाउन नपाइने अमेरिकाको आग्रह छ ।
यद्यपी चीनले यसबारेकेही प्रतिक्रिया दिएको छैन । चीन र अमेरीकाबीच पछिल्लो राष्ट्रपति निर्वाचनमा ट्रम्प आए पछि ताईवानी नेतासगँको टेलिफोन कुराकानी सहित विभिन्न विषयमा तनाव बढ्ने संकेत देखिएका बेला यो घटना भएको हो ।
