एजेन्सी मंसिर २१।
भारत तमिलनाडुकी मुख्य मन्त्री जयललिताको ६८ वर्षको उमेरमा निधन भएको छ । उहाँको गएराति पौने १२ बजे चेन्नईको अपोलो अस्पतालमा निधन भएको अस्पतालले जनाएको छ ।
स्वास्थ्यमा समस्या देखिएपछि गत सेप्टेम्बर २२ तारिखमा अस्पताल भर्ना गरिएको मन्त्री जयललितालाई आइतबार विहान हृदयघात भएपछि आइसियुमा राखेर उपचार थालिएको थियो ।
उहाँको निधनमा राष्ट्रपति प्रणव मुखर्जी, प्रधानमन्त्री नरेन्द्र मोदीलगायत भारतका बिभिन्न दलका नेताले शोक ब्यक्त गरेका छन् । पार्थिव शरीर उहाँको निवास पोयस गार्डेन लग्दा सडक वरपरका सर्वसाधारणमा रुवाबासी चलेको छ ।
उहाँको पार्थिव शरीर राजाजी हलमा साँझसम्म अन्तिम श्रद्धान्जलीका लागि राखिने र त्यसपछि अन्त्येष्टी गरिने अन्तराष्टिय सञ्चार माध्यमले जनाएका छन् । उहाँको निधनप्रति राज्यमा सात दिनसम्म शोक घोषणा गरिएको छ भने सरकारी भवनहरुका झण्डा आधा झुकाइएको छ ।
यसैबीच तमीलनाडुको मूख्यमन्त्रीमा ओ पनिरसेल्वमलाई मूख्यमन्त्री चयन गरिएको छ । जयललिताको सहयोगीका रुपमा क्रियाशील पनिरसेल्वमले पद तथा गोपनियताको शपथ लिइसक्नु भएको छ ।
यस्तै सन् १९८२ मा राजनीतिमा प्रवेश गर्नुभएको जयललिताले ८ पटक विधानसभा तथा एक पटक राज्यसभाको चुनाव लड्नु भएको थियो । ५ पटक सम्म तामिलनाडुको मुख्यमन्त्री बन्नुभएको जयललिताले एक सय ४० वटा चलचित्रमा अभिनय पनि गर्नु भएको थियो ।
