कार्तिक १० एजेन्सी । पाकिस्तानी अधिकारीहरुले बलुचिस्तानमा हिंशा मच्चाउने समुहहरुलाई भारतीय जासुसी संस्था रअले पैसा र हतियार दिईरहेको प्रमाण सहित अमेरीकालाई जानकारी दिएका छन् ।
मंगलबार क्वेटामा प्रहरी एकेडेमीमा ६१ जना प्रहरीको ज्यान जाने गरी भएको आक्रमणको भोलीपल्ट बुधबार पाकिस्तानी अधिकारीहरुले भारतले यसको लागि अफ्गानिस्तानको भूमि समेत प्रयोग गरेको दावी गरेका छन् ।
पाकिस्तानका राष्ट्रिय सुरक्षा सल्लाहकार पूर्व जनरल नासिर खान जानज्वाले अमेरीकी राजदुत डेभिड हालेलाई भेटेर यस्तो अवगत गराएका हुन् । यसै वर्ष भारतीय नौसेनामा कार्यरत रअका एक अधिकारीलाई बलुचिस्तानबाट पाकिस्तानी सेनाले पक्राउ गरेको थियो ।
भारतीय जासुसी संस्थाको रेखदेखमा अफ्गानिस्तानको भूमिबाट आत्रकवादीहरु तयार पारेर पाकिस्तानमा आक्रमण गराउने गरेकोले यसको जालो तोड्नु पर्ने र अमेरीकाको सद्भाव रहनेमा आफूहरु आशावादी रहेको सल्लाहकार जज्वाले बताएका थिए । सोही क्रममा अमेरीकी राजदुत हालेले क्वेटा प्रहरी एकेडेमीमा भएको आक्रमणको भत्र्सना गर्नु भएको छ ।
