एजेन्सी, ५ कार्तिक । इराककी प्रधानमन्त्री हैदर अल अबादीले मोसुल विद्रोहीको नियन्त्रणबाट निकट भविष्य मै मुक्त हुने दाबी गरेका छन् । प्रधानमन्त्री अबादीले मुलकुकै दोस्रो ठूलो शहर मोसुल लक्षित समयभन्दा छिटो विद्रोहीको नियन्त्रणबाट फिर्ता हुने दाबी गरेका हुन् ।
इराकको विशेष फौज मोसुल आक्रमणमा सहभागी भइरहेको बेला अवादीको दाबी सार्वजनिक भएको हो ।
इराकी प्रधानमन्त्रीले मोसुलको भविष्यबारे पेरिसमा भएको एक बैठकलाई भिडियो सम्बोधन गर्दै उक्त कुरा बताएका हुन् । बैठकको आतिथ्य गरिरहेका फ्रान्सका राष्ट्रपति फ्राँस्वाँ ओलाण्दले भने आइएस लडाकुहरु सिरियाको रक्कातर्फ भागेको र उनीहरुलाई रोक्नुपर्ने बताएका थिए ।
मोसुलमा सरकारी सेनालाई अमेरिकी नेतृत्वको गठबन्धनले पनि सहयोग गरिरहेको छ । उता सरकारको समर्थन गरेका कुर्द लडाकुहरुले पछिल्लो समय मोसुलको उत्तरतिर बृहत् कारवाही गरिरहेका छन् । मोसुल झण्डै अढाइ वर्षदेखि आइएस लडाकुको नियन्त्रणमा छ ।
