काठमाडौं, २८ चैत ।
भारत मुम्बई बम हमलाका मुख्य योजनाकार जकीउर रहमान लखवीको रिहाइप्रति अमेरिकाले चिन्ता व्यक्त गरेको छ ।
अमेरिकी विदेश विभागका प्रवक्ता जेफ राथकेले ‘पाकिस्तानले आतंकवादलाई प्रश्रय दिएको’ भन्दै ‘लखवीको रिहाइ गरेर पाकिस्तानले ठूलो भूल गरेको’ प्रतिक्रिया दिएका छन् ।
साथै, राथकेले लखवीको रिहाइले‘मुम्बई हमलामा मारिएकाहरुप्रति अन्याय भएको’ भन्दै ‘उनका परिवारजनले पनि पाकिस्तानलाई माफी नगर्ने’ जनाएका छन् ।
सन् २००८ मा गिरफतारीमा परेका लखवीलाई लाहोरको उच्च अदालतले गत डिसेम्बरमा जमानतमा रिहा गरेको थियो भने पन्जाब सरकारले उनलाई नजरबन्दमा राख्न फैसला सुनाएको थियो ।
नजरबन्दको निर्णय गलत भन्दै लाहौरको उच्च अदालतले उनलाई रिहा गरेको हो । उनको रिहाइमा भारतले आपत्ति जनाइसकेको छ ।
सन् २००८ मा मुम्बईमा भएको बम हमलामा १ सय ६६ जना मारिएका थिए । (एजेन्सी)
