काठमाडौँ — काठमाडौँ महानगरपालिकाका प्रमुख बालेन्द्र शाह (बालेन) ले विजयादशमीको अवसरमा स्वदेश तथा विदेशमा रहेका सम्पूर्ण नेपालीहरूमा सुख, शान्ति, समृद्धि र उत्तरोत्तर प्रगतिको शुभकामना व्यक्त गरेका छन्।
सामाजिक सञ्जालमार्फत शुभकामना सन्देश जारी गर्दै शाहले विजयादशमीलाई असत्यमाथि सत्यको विजयको प्रतीकका रूपमा उल्लेख गरेका छन्। यस पर्वले समाजमा सकारात्मक सोच, आपसी सद्भाव र सत्कर्मको भावना विकास गर्न प्रेरणा दिने उनको भनाइ छ।
पौराणिक मान्यताअनुसार दुर्गा भवानीले महिषासुरमाथि र भगवान् रामले रावणमाथि विजय प्राप्त गरेको प्रसङ्ग स्मरण गर्दै उनले विजयादशमीको धार्मिक तथा सांस्कृतिक महत्त्वबारे चर्चा गरेका छन्। मान्यजनबाट टीका, जमरा र आशीर्वाद ग्रहण गर्ने परम्पराले मानिसलाई सत्कर्मको मार्गमा हिँड्न प्रेरित गर्ने शाहले उल्लेख गरेका छन्। टाढा रहेका आफन्त तथा मान्यजनलाई खोजी-खोजी भेट्ने नेपाली परम्पराले पारिवारिक सम्बन्ध र आत्मीयतालाई अझ प्रगाढ बनाउने उनको विश्वास छ।
‘भ्रष्टाचार र बेथिति विरुद्ध एकजुट बनौँ’
आफ्नो शुभकामना सन्देशमा शाहले विजयादशमीले मानिसभित्र रहेका अहङ्कार, लोभ, ईर्ष्या, हिंसा र विभेदजस्ता नकारात्मक प्रवृत्ति त्याग्न प्रेरणा दिने बताएका छन्। यसका साथै समाजमा व्याप्त भ्रष्टाचार, कुशासन, ढिलासुस्ती, असमानता र राजनीतिक बेथिति अन्त्य गर्न सम्पूर्ण नागरिक एकजुट हुनुपर्नेमा उनले जोड दिएका छन्।
प्रत्येक नागरिकले सरकार आफ्ना लागि रहेको अनुभूति गर्न सक्ने वातावरण निर्माण हुनुपर्ने उल्लेख गर्दै उनले विकृति र विसङ्गति हटाउन सामूहिक प्रयासको आह्वान गरेका छन्।
“भ्रष्टाचार, कुशासन र राजनीतिक बेथितिलाई अन्त्य गर्न इमानदार प्रयास, दृढ अठोट र सामूहिक मेहनत आवश्यक छ,” उनले भनेका छन्, “देशमा वास्तविक परिवर्तन ल्याउनका लागि सोचमा मात्र नभई व्यवहारमा समेत सुधार ल्याउनु अनिवार्य भइसकेको छ।”
विविधता र एकताको पर्व
भौगोलिक, सांस्कृतिक तथा भाषिक विविधताले भरिएको नेपाली समाजमा विजयादशमीले सबै वर्ग, समुदाय र क्षेत्रका नागरिकलाई एकताको सूत्रमा बाँध्न महत्त्वपूर्ण भूमिका खेल्ने शाहले बताएका छन्। वर्षौँदेखि टाढिएका आफन्तसँग भेटघाट गरी सुख-दुःख साटासाट गर्ने अवसरका रूपमा समेत यस पर्वको विशेष महत्त्व रहेको उनको भनाइ छ।
सन्देशको अन्त्यमा उनले आपसी सद्भाव, एकता र सहकार्यलाई बलियो बनाउँदै विकृतिमुक्त तथा समुन्नत समाज निर्माणको अभियानमा जुट्न सम्पूर्ण नेपालीहरूमा हार्दिक आह्वान गरेका छन्।
