काठमाडौँ । नेपाली कांग्रेसको १५औँ महाधिवेशनबाट सभापति पदमा निर्वाचित गगनकुमार थापाले आज (असोज ३१ गते) पद तथा गोपनीयताको शपथ ग्रहण एवं पदबहाली गर्ने भएका छन्।
बडादसैँको फूलपातीका अवसरमा आज दिउँसो २ बजे ललितपुरको सानेपास्थित पार्टी केन्द्रीय कार्यालयमा नवनिर्वाचित सभापति थापाको शपथ ग्रहण तथा पदबहाली कार्यक्रम तय गरिएको छ। महाधिवेशनअन्तर्गत नयाँ नेतृत्व चयनका लागि भएको निर्वाचनको अन्तिम मतपरिणाम सार्वजनिक भएसँगै थापाले आजै जिम्मेवारी सम्हाल्न लागेका हुन्।
समारोहमा सहभागी हुन नेपाली कांग्रेस केन्द्रीय कार्यालयले उपत्यकामा उपलब्ध पार्टीका नेता, कार्यकर्ता तथा सञ्चारकर्मीहरूलाई निमन्त्रणा गरेको कार्यवाहक मुख्यसचिव कृष्णप्रसाद दुलालले जानकारी दिए।
केन्द्रीय समितिका अन्य नवनिर्वाचित पदाधिकारी तथा सदस्यहरूको शपथ ग्रहण भने दसैँपछि मात्र गरिने कांग्रेसले जनाएको छ। नेपाली कांग्रेसको १५औँ महाधिवेशनले २३१ सदस्यीय नयाँ केन्द्रीय कार्यसमिति चयन गरेको छ।
