१९ असोज, २०८३ (५ अक्टोबर, २०२६)
काठमाडौँ। नेपाली कांग्रेसको १५औँ महाधिवेशनको दोस्रो दिन बन्दसत्रमा चारवटा मुख्य प्रतिवेदनहरू पेस गरिएका छन्। बन्दसत्रको प्रारम्भमा पार्टीका सभापति गगन थापाले आफ्नो राजनीतिक प्रतिवेदन पेस गर्नुभएको छ। प्रतिवेदन पेस गर्नुअघि सभापति थापाले बन्दसत्रको हलमा प्रतिवेदनका प्राथमिकता र भावी राजनीतिक दिशाबारे सम्बोधन गर्नुभएको थियो।
पार्टीका प्रवक्ता देवराज चालिसेका अनुसार बन्दसत्रमा उपसभापति विश्वप्रकाश शर्माले समसामयिक प्रतिवेदन, महामन्त्री गुरुराज घिमिरेले सांगठनिक प्रतिवेदन र कोषाध्यक्ष उमेश श्रेष्ठले आर्थिक प्रतिवेदन पेस गर्नुभएको छ। पेस गरिएका चारै प्रतिवेदनमाथि बन्दसत्रमा गहन छलफल चलाउने प्रक्रिया अघि बढाइएको छ।
छलफललाई व्यवस्थित र प्रभावकारी बनाउन कांग्रेसले बन्दसत्रका लागि हिमाल, पहाड र तराई नामकरण गरिएका तीनवटा छुट्टाछुट्टै हलहरूको व्यवस्था गरेको छ। भौगोलिक आधारमा प्रतिनिधिहरूलाई विभाजन गरी ती हलहरूमा प्रतिवेदनमाथि छलफल भइरहेको छ।
पार्टी नेतृत्वले पेस गरिएका चारै प्रतिवेदनहरूलाई आजै बन्दसत्रबाट पारित गराउने तयारी गरेको छ। बन्दसत्रबाट प्रतिवेदनहरू पारित भएपछि नयाँ नेतृत्व चयनका लागि निर्वाचन कार्यतालिका अनुसार मंगलबार बिहान १० बजेदेखि उम्मेदवारी दर्ता प्रक्रिया सुरु हुनेछ।
