१६ असोज, २०८३ (२ अक्टोबर, २०२६)
काठमाडौँ। परराष्ट्रमन्त्री शिशिर खनालले नेपालको विदेश नीति र कूटनीतिक सम्बन्धलाई राजनीतिक दायरामा मात्र सीमित नराखी राष्ट्रिय आर्थिक हित, उत्पादन वृद्धि र समृद्धिको लक्ष्यसँग प्रत्यक्ष रूपमा जोड्नुपर्नेमा जोड दिनुभएको छ। एसियन इन्स्टिच्युट अफ डिप्लोमेसी एन्ड इन्टरनेसनल अफेयर्स (आईडा) द्वारा आयोजित ‘चौथो आईडा लेक्चर सिरिज’ मा सम्बोधन गर्दै मन्त्री खनालले आर्थिक कूटनीतिलाई नेपालको समग्र विकास रणनीतिको अभिन्न अङ्ग बनाउनुपर्ने बताउनुभएको हो।
‘समृद्ध नेपालका लागि आर्थिक कूटनीति: आर्थिक हितसँग विदेश नीतिको सामञ्जस्य’ विषयमा आफ्नो प्रस्तुति दिँदै मन्त्री खनालले व्यापार विस्तार, वैदेशिक लगानी भित्र्याउने, पर्यटन प्रवर्द्धन, रोजगारी सिर्जना र प्रविधि हस्तान्तरणजस्ता आर्थिक प्राथमिकता हासिल गर्न कूटनीतिक माध्यमको प्रभावकारी उपयोग हुनुपर्ने धारणा राख्नुभयो। यसका लागि विदेशस्थित नेपाली नियोगहरूलाई लगानी र व्यापारका सक्रिय प्रवर्द्धकका रूपमा परिचालन गरिने उहाँको भनाइ थियो।
मन्त्री खनालले आर्थिक कूटनीति सरकारको एउटा मन्त्रालयको मात्र नभई निजी क्षेत्र, उद्यमी र गैरआवासीय नेपाली (प्रवासी) समुदायको साझा प्रयासबाट सफल हुने स्पष्ट पार्नुभयो। प्रवासी नेपालीहरूको पूँजी, ज्ञान, सीप र अन्तर्राष्ट्रिय व्यावसायिक सञ्जाललाई नेपालको आर्थिक रूपान्तरणमा प्रयोग गर्नुपर्नेमा जोड दिँदै मन्त्री खनालले अन्तर्राष्ट्रिय कूटनीतिक उपलब्धिलाई ठोस आर्थिक परिणाम र स्थानीय रोजगारमा रूपान्तरण गर्न समन्वित कार्ययोजनाका साथ अघि बढ्ने प्रतिबद्धता व्यक्त गर्नुभयो।
