काठमाडौं : २० औं एसियन गेम्सअन्तर्गत पुरुष क्रिकेटको क्वाटरफाइनल खेलमा वर्षा बाधक बनेपछि नेपाल प्रतियोगिताबाट बाहिरिएको छ। नेपाल र श्रीलंकाबीच आज तय भएको क्वाटरफाइनल खेल वर्षाका कारण पूर्ण रूपमा रद्द हुन पुग्यो। खेल रद्द भएपछि नियम अनुसार आइसिसी वरियतालाई आधार मान्दा श्रीलंका सेमिफाइनलमा प्रवेश गरेको छ।
यससँगै समूह चरणमा उत्कृष्ट र शानदार प्रदर्शन गर्दै आएको नेपाली टिमको यसपटकको एसियन गेम्स यात्रा क्वाटरफाइनलबाट नै टुंगिन पुगेको छ। अब श्रीलंकाले सेमिफाइनलमा भारतको सामना गर्नेछ।
जारी एसियन गेम्समा आइसिसी वरियताको आधारमा चार टोलीले सिधै क्वाटरफाइनलमा स्थान बनाएका थिए, जसमा भारत, श्रीलंका, बंगलादेश र पाकिस्तान रहेका थिए। यसअघि सोमबार तय भएका क्वाटरफाइनलका खेलहरू पनि वर्षाकै कारण रद्द हुँदा वरियताकै आधारमा भारत र पाकिस्तान सेमिफाइनलमा प्रवेश गरिसकेका छन्।
नेपालको प्रदर्शन र आगामी खेलहरू समूह चरणका खेलहरूमा उत्कृष्ट लयमा देखिएको नेपालले यस प्रतियोगितामा उच्चस्तरीय प्रदर्शन गरेर सबैको ध्यान खिचेको थियो। तर, प्रकृतिले साथ नदिँदा र मैदानमा बल खेल्नै नपाई खेल रद्द हुँदा नेपाल भाग्यको खेलमा पछि पर्दै बाहिरिन बाध्य भयो।
क्वाटरफाइनलको अन्तिम खेलमा मलेसिया र बंगलादेशबीच प्रतिस्पर्धा हुने तालिका रहेको छ। उक्त खेल नेपाली समयअनुसार बिहान १०:४५ मा सुरु हुनेछ भने यदि सो खेलमा पनि वर्षाले बाधा पुर्याएमा बंगलादेश पनि आइसिसी वरियताको आधारमा सेमिफाइनलमा प्रवेश गर्नेछ।
