१२ असोज, २०८३ (२८ सेप्टेम्बर, २०२६)
रूसको कुर्स्क क्षेत्रमा पक्राउ परेका दुई उत्तर कोरियाली सैनिकलाई दक्षिण कोरिया पठाइएको विषय सार्वजनिक भएपछि दक्षिण कोरिया र युक्रेनबिच कूटनीतिक विवाद चर्किएको छ। युक्रेनका राष्ट्रपति भोलोदिमिर जेलेन्स्कीले न्युयोर्कस्थित संयुक्त राष्ट्रसङ्घको महासभालाई सम्बोधन गर्ने क्रममा ती सैनिकहरूलाई दक्षिण कोरिया हस्तान्तरण गरिएको जानकारी दिएपछि विवाद सिर्जित भएको हो।
दक्षिण कोरियाका वरिष्ठ राष्ट्रपतीय सचिव सुङ की-हङले विषयको संवेदनशीलताका कारण सैनिक स्थानान्तरणबारे जानकारी गोप्य राख्ने द्विपक्षीय सहमति भए पनि युक्रेनले ‘एकपक्षीय र अचानक’ सार्वजनिक गरेको भन्दै गम्भीर असन्तुष्टि व्यक्त गर्नुभएको छ। दक्षिण कोरियाले युक्रेनसँग आधिकारिक स्पष्टीकरण र माफीको माग गरेको छ। यद्यपि, जेलेन्स्कीका सञ्चार सल्लाहकार दिमित्रो लिट्भिनले भने सैनिक स्थानान्तरण गोप्य राख्ने कुनै सम्झौता वा सहमति नभएको भन्दै दक्षिण कोरियाको दाबी अस्वीकार गर्नुभएको छ।
सन् २०२५ जनवरीमा युक्रेनी सेनाको नियन्त्रणमा परेका ती सैनिकहरूले दक्षिण कोरिया जान इच्छा व्यक्त गरेपछि जुलाईमा दुई देशबिच मानवीय सिद्धान्तका आधारमा स्थानान्तरणको सहमति भएको थियो। मानवअधिकार विज्ञहरूका अनुसार यी सैनिकहरूको पहिचान सार्वजनिक हुँदा उत्तर कोरियामा रहेका उनीहरूका परिवारले कठोर सामूहिक सजाय भोग्नुपर्ने जोखिम बढेको छ। यस घटनाले दक्षिण कोरियाका राष्ट्रपति ली जे-म्युङलाई घरेलु राजनीतिमा समेत दबाबमा पारेको छ भने हतियार आपूर्ति र रूससँगको व्यापारिक सम्बन्धलाई लिएर दुई देशबिच पहिलेदेखि नै रहेको तिक्ततालाई अझ बढाएको छ।
