चिनियाँ राष्ट्रपति सी चिनफिङ बुधबार अमेरिकाको तीनदिने राजकीय भ्रमणमा जाँदैछन्। भ्रमणका क्रममा वासिङ्टननजिकै रहेको जोइन्ट बेस एन्ड्रयुज विमानस्थलमा अवतरण गर्दा अमेरिकी राष्ट्रपति डोनाल्ड ट्रम्प आफैँ विमानस्थल पुगेर स्वागत गर्ने भएका छन्। सामान्यतया विदेशी राष्ट्रप्रमुखहरूलाई ह्वाइट हाउसमा स्वागत गर्ने कूटनीतिक परम्परा तोड्दै ट्रम्पले सीका लागि यो दुर्लभ र विशेष सम्मान दिन लागेका हुन्।
भ्रमणको मुख्य दिन बिहीबार ट्रम्प र प्रथम महिला मेलानियाले ह्वाइट हाउसमा सी र उनकी पत्नी पेङ ल्युआनलाई स्वागत गर्ने कार्यक्रम छ। ह्वाइट हाउसको रोज गार्डेनमा गार्ड अफ अनर र सैन्य निरीक्षणपछि दुई नेताहरूबिच उच्चस्तरीय द्विपक्षीय वार्ता हुनेछ। सोही क्रममा प्रथम महिला मेलानिया ट्रम्प र पेङ ल्युआन भने अलग्गै सांस्कृतिक कार्यक्रममा सहभागी हुनेछन्। बिहीबार साँझ ट्रम्प दम्पतीले चिनियाँ प्रतिनिधिमण्डलको सम्मानमा राजकीय भोज (State Dinner) आयोजना गर्नेछन्।
