पूर्व बेलायती प्रधानमन्त्री बोरिस जोन्सन, पूर्व स्विडिस प्रधानमन्त्री कार्ल बिल्ड्ट र पूर्व सीआईए निर्देशक डेभिड पेट्रियससहित युरोपेली सुरक्षा अधिकारीहरू यात्रा गरिसकेलगत्तै युक्रेनको पोल्यान्ड सीमा नजिकैको रेलमार्गमा रुसी ड्रोनले प्रहार गरेको छ। किभमा आयोजित वार्षिक सम्मेलनमा सहभागी भई पोल्यान्डतर्फ फर्किँदै गरेका नेताहरू ओर्लिएको केही समयमै पोल्यान्ड सीमाबाट करिब ५ किलोमिटर टाढा रहेको युक्रेनको याहोदिन स्टेसनमा आक्रमण भएको फाइनान्सियल टाइम्सले जनाएको छ।
आक्रमणअघि नै यात्रुहरूलाई सुरक्षित रूपमा बाहिर निकालिएकाले घटनामा कुनै मानवीय क्षति भने भएको छैन। घटनापछि प्रतिक्रिया दिँदै पूर्व प्रधानमन्त्री जोन्सनले रुसी राष्ट्रपति भ्लादिमिर पुटिनको कडा आलोचना गर्दै युक्रेनलाई आवश्यक सैन्य सहयोग उपलब्ध गराउन पश्चिमी मुलुकहरूसँग आग्रह गरेका छन्। यस्तै स्विडिस नेता बिल्ड्टले सुरक्षा प्रणाली चुस्त भएकाले ठूलो दुर्घटना टरेको बताएका छन्।
सीमाक्षेत्र नजिकै भएको यस रुसी आक्रमणपछि पोल्यान्डका प्रधानमन्त्री डोनाल्ड टस्कले उच्च सुरक्षा अधिकारीहरूको आपतकालीन बैठक बोलाएका छन् भने पोल्यान्डले आफ्ना लडाकु विमानहरूसमेत परिचालन गरी हवाई सुरक्षा उच्च सतर्कतामा राखेको छ। युक्रेनी विदेशमन्त्री आन्द्रेइ सिबिहाले यस घटनालाई पुटिनको आतङ्क ईयू र नेटोको ढोकामै आइपुगेको भन्दै रुसमाथि थप कडा प्रतिबन्ध लगाउन अन्तर्राष्ट्रिय समुदायसँग अपिल गरेका छन्।
