जापानको अर्थतन्त्र चालु वर्षको दोस्रो त्रैमासिकमा प्रारम्भिक अनुमानभन्दा तीव्र गतिले विस्तार भएको संशोधित सरकारी तथ्यांकले देखाएको छ । यो तथ्यांक जापानको केन्द्रीय बैंकले आगामी साता ब्याजदर बढाउने अपेक्षाबीच सार्वजनिक भएको हो ।
जापानको मन्त्रिपरिषद् कार्यालयका अनुसार अप्रिलदेखि जुनसम्मको तीन महिनाको अवधिमा विश्वको चौथो ठूलो अर्थतन्त्र ०.४ प्रतिशतले विस्तार भएको छ । यसअघि सार्वजनिक गरिएको प्रारम्भिक तथ्यांकमा आर्थिक वृद्धि ०.३ प्रतिशत रहने अनुमान गरिएको थियो ।
विश्लेषकहरूले प्रारम्भिक तथ्यांकले मुद्रास्फीति तीव्र रूपमा बढिरहेका बेला तथा कमजोर येनका कारण दबाबमा रहेको जापानको केन्द्रीय बैंकलाई ब्याजदर बढाउन केही कठिनाइ पार्न सक्ने बताएका थिए ।
संशोधित तथ्यांकअनुसार निजी उपभोग र कम्पनीहरूको लगानी कमजोर नै रहे पनि प्रारम्भिक अनुमानभन्दा केही राम्रो देखिएको छ । अर्कोतर्फ, आयात प्रारम्भिक अनुमानभन्दा कम रहेकाले कुल गार्हस्थ्य उत्पादनको संशोधित वृद्धिदर माथि जान सहयोग पुगेको हो ।
जापानको केन्द्रीय बैंकले आगामी साता मुख्य ब्याजदर बढाउने अपेक्षा गरिएको छ । यसैबीच प्रधानमन्त्री साने ताकाइचीले मन्त्रिपरिषद् पुनर्गठन गर्ने तयारी गरेको समाचारहरू सार्वजनिक भएका छन् । यद्यपि ठूलो परिवर्तनको अपेक्षा गरिएको छैन ।
उच्च तेल आयात लागत तथा प्रधानमन्त्री ताकाइचीको खर्चसम्बन्धी योजनालाई लिएर देखिएको चिन्ताका कारण जापानी येनमाथि दबाब परेको छ ।
तर ब्याजदर वृद्धिको सम्भावनाबारे चर्चा बढेसँगै यस महिनामा येन केही बलियो भएको छ र यो वर्षकै उच्च स्तरतर्फ अघि बढिरहेको छ ।
अमेरिकी अर्थमन्त्री स्कट बेसेन्टले जापानको केन्द्रीय बैंकका गभर्नर काजुओ उएदासँगको कुराकानीमा जापानले बजार तथा मौद्रिक क्षेत्रमा निर्णायक कदम चाल्नुपर्ने पक्षमा आफू रहेको बताएपछि पनि येनलाई थप समर्थन पुगेको छ ।
