अफ्रिकी देश काबो भर्डेको फोगो द्वीपमा शनिबार राति भएको भीषण बस दुर्घटनामा कम्तीमा २१ जनाको मृत्यु भएको छ । दुर्घटनामा केही अन्य व्यक्ति घाइते भएका स्थानीय अधिकारीहरूले बताएका छन् ।
स्थानीय अधिकारीका अनुसार यात्रु बोकेको बस सडकबाट अनियन्त्रित भई करिब ३० मिटर गहिरो भिरमा खसेको थियो । दुर्घटना फोगो द्वीपको उत्तरी उच्च भूभागमा पर्ने साओ फिलिपे नगरपालिकाअन्तर्गत चा दास काल्देइरास र क्याम्पानास दे सिमाबीचको सडकमा भएको हो ।
काबो भर्डेका राष्ट्रपति जोसे मारिया नेभेसले सुरुमा दुर्घटनामा कम्तीमा १० जनाको मृत्यु भएको जानकारी दिनुभयो । पछि सामाजिक सञ्जालमार्फत मृतकको संख्या बढेर २१ पुगेको जानकारी दिँदै उहाँले मृतकका परिवारप्रति समवेदना व्यक्त गर्नुभएको हो ।
स्थानीय समाचार संस्था इन्फोप्रेसका अनुसार बस सडकबाट चिप्लिएर करिब ३० मिटर तलको भिरमा खसेपछि दुर्घटना भएको हो । दुर्घटनामा बसमा सवार अधिकांश यात्रु युवा उमेरका रहेको बताइएको छ । उनीहरूमध्ये मुख्य रूपमा कर्राल ग्रान्डे र पोन्ता भेर्देका माध्यमिक तहका विद्यार्थी रहेको जनाइएको छ । दुर्घटनामा बस चालकको समेत मृत्यु भएको इन्फोप्रेसले जनाएको छ ।
विद्यालयको औपचारिक कार्यक्रम थिएन
स्थानीय शिक्षा अधिकारीहरूले उक्त भ्रमण विद्यालयले आयोजना गरेको औपचारिक शैक्षिक कार्यक्रम नभएको स्पष्ट पारेका छन् । उनीहरूका अनुसार विद्यार्थीहरूलाई वर्षभरि विद्यालय आवतजावत गराउने बस चालकले आफ्नै पहलमा वार्षिक भ्रमणका रूपमा निजी रूपमा उक्त यात्रा आयोजना गरेका थिए ।
उद्धार कार्य जारी
साओ फिलिपे नगरपालिकाका नागरिक सुरक्षा मामिलाका पार्षद जोआओ जोसे कानुतोका अनुसार दुर्घटनास्थल निकै दुर्गम र पहुँच कठिन क्षेत्रमा रहेकाले उद्धार कार्य चुनौतीपूर्ण बनेको छ ।
उद्धार टोलीले घटनास्थलमा निरन्तर काम गरिरहेको भए पनि कठिन भौगोलिक अवस्थाका कारण उद्धार तथा शव पहिचानमा समय लागिरहेको अधिकारीहरूले बताएका छन् । कानुतोले मृतकको संख्या अझै बढ्न सक्ने चेतावनी दिएका छन् ।
उद्धार तथा खोजी कार्य सम्पन्न भएपछि र सबै पीडितको पहिचान पूरा भएपछि दुर्घटनामा भएको मानवीय क्षतिको अन्तिम विवरण सार्वजनिक गरिने अपेक्षा गरिएको छ ।
दुर्घटना कसरी भयो भन्ने विषयमा सम्बन्धित निकायले अनुसन्धान सुरु गरेका छन् । प्रारम्भिक विवरणअनुसार बस सडकबाट बाहिरिएर भिरमा खसेको भए पनि दुर्घटनाको ठ्याक्कै कारण अझै खुल्न सकेको छैन ।
