पाकिस्तानले भारतीय विमानहरूका लागि आफ्नो हवाई क्षेत्र प्रयोगमा लगाउँदै आएको प्रतिबन्धको अवधि पुनः एक महिनाका लागि थप गरेको छ। पाकिस्तान नागरिक उड्डयन प्राधिकरणले नयाँ ‘नोटिस टु एयरमेन’ जारी गर्दै अगस्ट २३ मा सकिन लागेको प्रतिबन्धलाई आगामी सेप्टेम्बर २४ सम्मका लागि लम्ब्याएको हो। सन् २०२५ को अप्रिलमा भएको घातक पहलगाम आतङ्ककारी हमलापछि दुवै देशले एक-अर्काका नागरिक तथा व्यावसायिक उडानका लागि आ-आफ्नो हवाई क्षेत्र बन्द गर्दै आएका छन्।
नयाँ निर्णय अनुसार अगस्ट २३ बिहान १०:१५ बजेदेखि सेप्टेम्बर २४ बिहान ४:५९ बजेसम्म पाकिस्तानी आकाश भारतीय विमानका लागि पूर्ण रूपमा बन्द रहनेछ। पाकिस्तानको कराँची र लाहोर दुवै ‘फ्लाइट इन्फर्मेसन रिजन’ अन्तर्गत पर्ने यो प्रतिबन्ध भारतीय दर्ता भएका, भारतीय एयरलाइन्सद्वारा सञ्चालित तथा भाडामा लिइएका सम्पूर्ण गैर-सैन्य विमानहरूमा लागू हुनेछ। पहलगाम हमलामा २६ जनाको ज्यान गएपछि भारतले पनि reciprocal कदम चाल्दै पाकिस्तानी विमान, सैन्य उडान र एयरलाइन्सका लागि आफ्नो आकाश प्रयोगमा रोक लगाएको थियो।
दुवै छिमेकी देशले निरन्तर रूपमा हवाई क्षेत्र बन्द गर्दा अन्तर्राष्ट्रिय उडानहरूले लामो र घुमाउरो वैकल्पिक मार्ग प्रयोग गर्नुपरेको छ। यसका कारण खाडी मुलुक तथा पश्चिमी देशहरुतर्फ हुने उडानहरूको समय बढेको छ भने एयरलाइन्स कम्पनीहरूलाई इन्धन खपत बढ्दा ठूलो आर्थिक भार परेको छ। यसको प्रत्यक्ष असर यात्रुहरूमा परेको छ, जसले गर्दा हवाई भाडा महँगिनुका साथै यात्रा समयसमेत लम्बिएको छ।
