वासिङ्टन — अमेरिकामा पुनः एकपटक गोलाबारीको दर्दनाक घटना सार्वजनिक भएको छ। अमेरिकाको मिसिगन राज्यमा भएको अन्धाधुन्ध गोली प्रहारबाट ६ जनाको मृत्यु भएको छ। मृतकमध्ये घटनाका संदिग्ध आक्रमणकारी पनि रहेका छन्। प्रहरीले घटनाको छानबिन सुरु गरेको छ।
प्रहरीका अनुसार यो घटना डिट्रोइटबाट करिब २७२ किलोमिटर टाढा रहेको मिसौकी काउन्टीमा घटेको हो। दिउँसोको समयमा एउटा घरमा गोलाबारी भएको सूचना पाएलगत्तै प्रहरी टोली घटनास्थल पुगेको थियो। त्यहाँ तीन जना मृत भेटिएका थिए भने एक जना गम्भीर घाइते अवस्थामा थिए। घाइतेलाई तुरुन्तै उपचारका लागि अस्पताल भर्ना गरिएको छ।
प्रहरी घटनास्थल पुग्दासम्म संदिग्ध आरोपी फरार भइसकेका थिए। आक्रमणकारीको पहिचान ३९ वर्षीय चाड हिकम्यानको रूपमा भएको छ।
आक्रमणकारीको खोजीका लागि प्रहरीले व्यापक अभियान चलाइरहेका बेला नजिकैको अर्को घरमा पनि एक व्यक्तिको गोली हानी हत्या गरिएको खबर प्राप्त भयो।
यसपछि प्रहरीले सर्वसाधारणका लागि चेतावनी जारी गर्दै आरोपी हिकम्यान हतियारधारी र अत्यन्तै खतरनाक भएकाले सतर्क रहन आग्रह गरेको थियो। खोजी कार्यकै क्रममा प्रहरीले एउटा जंगल नजिकै संदिग्धको गाडी फेला पारेको थियो। उक्त क्षेत्रमा छानबिन गर्दा प्रहरीले आक्रमणकारी हिकम्यान र अर्का एक व्यक्तिको शव फेला पारेको हो।
गोलाबारीको वास्तविक कारण अझै खुल्न सकेको छैन। प्रहरीका अनुसार मृतकहरूबीच आपसमा के-कस्तो सम्बन्ध थियो र आक्रमण किन गरियो भन्ने विषयमा गहन अनुसन्धान भइरहेको छ।
प्रहरीले जारी गरेको विज्ञप्तिमा यो घटना अत्यन्तै हृदयविदारक रहेको र स्थानीय समुदायका लागि कठिन समय भएको उल्लेख छ। सर्वसाधारणलाई घटनास्थल वरपर नजान अपिल गर्दै प्रहरीले अनुसन्धानको प्रगति लगत्तै सार्वजनिक गरिने जनाएको छ। हालसम्म मृतकहरूको आधिकारिक पहिचान भने खुलाइएको छैन।
