काठमाडौँ, साउन ३० — पाकिस्तानले आफ्नो ८० औँ स्वतन्त्रता दिवस (अगस्ट १४) मनाइरहँदा बलोचिस्तान प्रान्तमा भने व्यापक हिंसा, सुरक्षा निकायमाथि हमला र विरोध प्रदर्शन भएका छन्। लामो समयदेखि स्वायत्तता र अधिकारका लागि सङ्घर्षरत बलोच अलगाववादी समूह तथा मानवाधिकार सङ्गठनहरूले पाकिस्तानको स्वतन्त्रता दिवसलाई ‘कालो दिन’ (ब्ल्याक डे) का रूपमा मनाएका हुन्।
स्वतन्त्रता दिवसको अवसरमा आयोजित औपचारिक कार्यक्रमहरू बहिष्कार गर्दै बलोच पृथकतावादी समूहहरूले प्रान्तका विभिन्न स्थानमा समन्वयात्मक आक्रमण गरेका छन्। बलोचिस्तानका गृहमन्त्रीको कन्ट्याक्ट टोली (काफिला) माथि सशस्त्र समूहले गराएको आक्रमणमा तीन प्रहरीसहित छ जना गम्भीर घाइते भएका छन्।
यसैबिच, हर्नाईस्थित ‘५-माइल’ प्रहरी चौकीमा शक्तिशाली विस्फोटक पदार्थ प्रयोग गरी विस्फोट गराइएको छ। उक्त आक्रमणको जिम्मेवारी बलोच लिबरेसन आर्मी (BLA) ले लिएको छ। यस्तै तुर्बतको शहीद फिदा चोकनजिकै फ्रन्टियर कर्प्स (FC) को सवारीसाधनलाई लक्षित गरी गरिएको विस्फोटमा दुई जना सर्वसाधारण घाइते भएका छन्।
हडतालले जनजीवन ठप्प, महिलाहरूद्वारा झण्डा जलाएर विरोध
‘बलोच युनिटी कमिटी’ (BUC) ले आह्वान गरेको आमहडतालका कारण बलोचिस्तानका मुख्य सहरहरूमा व्यापारिक तथा व्यावसायिक गतिविधि पूर्ण रूपमा ठप्प बनेका छन्। तुर्बत लगायतका क्षेत्रमा प्रहरी तथा अर्धसैनिक बलले जबरजस्ती पसलहरू खुलाउन खोजे पनि स्थानीयले हडताल जारी राखेका थिए।
प्रतिकारात्मक विरोध स्वरूप विभिन्न जिल्लाहरूमा बलोच महिलाहरूले सार्वजनिक रूपमै पाकिस्तानको राष्ट्रिय झण्डा जलाएर सरकारले तय गरेका अनिवार्य समारोहहरू अस्वीकार गरेका छन्। सन् १९४७ मा बलोचिस्तानलाई जबरजस्ती पाकिस्तानमा गाभिएको दाबी गर्दै आएका बलोच समूहहरूले सैन्य अपरेशन र नागरिक अधिकारमाथिको दमनका बिच यो स्वतन्त्रता दिवस ‘झूठो’ रहेको टिप्पणी गरेका छन्।
