पाकिस्तानको बलोचिस्तानस्थित ग्वादरमा बलोच प्रदर्शनकारीहरूको कडा प्रतिरोधपछि पाकिस्तानी सेना पछि हटेको छ। प्रदर्शनकारीलाई हटाउन खटिएका पाकिस्तानी सैनिकहरू बलोचहरूको भारी भीड देखेपछि सवारीसाधनमा चढेर भाग्न बाध्य भएको भिडियो सार्वजनिक भएको छ।
विदेशमा रहेका बलोच विद्रोही नेता मीर यार बलोचले सामाजिक सञ्जालमा उक्त भिडियो सेयर गर्दै ग्वादरमा स्थानीय नागरिकको दबाबका कारण सेना पछि हटेको दाबी गरेका छन्। भिडियोमा बलोच प्रदर्शनकारीहरूको ठूलो समूह सेनाको गाडीतिर अघि बढेपछि सैनिकहरू हतार-हतार ट्रकमै चढेर फर्किएको देखिन्छ।
बलोच प्रदर्शनकारीहरूले लामो समयदेखि ग्वादरमा चिनियाँ प्रभुत्व र कब्जाको विरोध गर्दै आएका छन्। पाकिस्तान सरकारले ग्वादरको ठूलो भूभाग चीनलाई सुम्पेको, स्थानीयलाई आफ्नै क्षेत्रमा आवतजावतमा रोक लगाएको र परम्परागत रूपमा माछा मार्दै आएका स्थानीय माझीहरूलाई विस्थापित गरी चिनियाँ ट्रयाङ्कहरूले माछा मार्न थालेको भन्दै उनीहरू आक्रोशित छन्।
चीन-पाकिस्तान आर्थिक करिडोर (CPEC) को मुख्य केन्द्रबिन्दु मानिएको ग्वादरमा चीनले विशाल बन्दरगाह निर्माण गरिरहेको छ। चीनले उक्त क्षेत्रबाट सीधा सडक मार्ग भई आफ्नै सिन्जियाङ प्रान्तसम्म सामान पुर्याउने र सानो नौसैनिक अड्डा समेत स्थापना गर्ने तयारी गरिरहेको छ, जसको स्थानीय बलोच समुदायले निरन्तर विरोध गर्दै आएका छन्।
