वासिङ्टन डीसी । अधिकांश जनमत सर्वेक्षणहरूले इरानसँग भइरहेको युद्धमा ३० प्रतिशतभन्दा कम अमेरिकी नागरिकहरूको मात्रै समर्थन रहेको देखाएका छन्, र यो संख्या लगातार घट्दो क्रममा छ।
यसको पछाडि मुख्य रूपमा केही महत्त्वपूर्ण कारणहरू रहेका छन्। राष्ट्रपति डोनाल्ड ट्रम्पले चुनावी अभियानका क्रममा वैदेशिक हस्तक्षेपको अन्त्य गर्ने र अमेरिकालाई “कहिल्यै अन्त्य नहुने युद्धहरू” (फॉरेभर वार्स) बाट बाहिर निकाल्ने वाचा गरेका थिए। यसका साथै, युद्धका कारण तेल र ऊर्जाको मूल्यमा भारी वृद्धि भएसँगै दैनिक उपभोग्य वस्तु तथा सेवाहरूको लागत समेत निकै बढेको छ।
बुधबार राष्ट्रपतिले डोभर एयर फोर्स बेसको भ्रमण गर्दा युद्धमा ज्यान गुमाउने अमेरिकी सैनिकहरूको बढ्दो संख्याले पनि त्यहाँका नागरिकहरूलाई गम्भीर रूपमा प्रभावित बनाएको स्पष्ट देखिएको छ। तर, सबैभन्दा मुख्य कुरा अमेरिकीहरूले यो युद्ध देशका लागि अत्यधिक महँगो सावित भइरहेको महसुस गरेका छन्।
यसै साता क्यापिटोल हिलमा रक्षा सचिव र ज्वाइन्ट चिफ अफ स्टाफका अध्यक्ष लगायतका शीर्ष अधिकारीहरूले इरानसँगको युद्धका लागि थप बजेट आवश्यक रहेको बताएका थिए। जब कि, राष्ट्रपतिले सुरुमा यो द्वन्द्व छोटो समयमै टुङ्गिने संकेत दिएका थिए।
अहिले अमेरिकी तल्लो सदन (हाउस अफ रिप्रिजेन्टेटिभ्स) ले यो युद्धका लागि थप ७३ अर्ब डलरसम्म खर्च गर्न अनुमति दिने प्रस्ताव पारित गरेको छ, जसलाई अधिकांश अमेरिकीहरूले देशले धान्न नसक्ने खर्च भनिरहेका छन्।
