काठमाडौँ। अमेरिकाले इरानमाथि आफ्नो हवाई आक्रमणलाई थप तीव्र पारेको छ। युद्धविराम भङ्ग भएयता अमेरिकाले मंगलबार राति लगातार ११औँ दिन पनि इरानका विभिन्न सहरहरूलाई निशाना बनाएर भीषण हमला गरेको हो।
पछिल्लो चरणको यो हवाई आक्रमण एक घण्टाभन्दा बढी समयसम्म चलेको थियो। अमेरिकी केन्द्रीय कमान्ड (सेन्टकम) का अनुसार हर्मुज स्ट्रेटमा व्यावसायिक जहाजहरूको आवागमनमा इरानले पुर्याउन सक्ने अवरोध र क्षमतालाई कमजोर पार्न यो कारबाही गरिएको हो। आक्रमणमा इरानका विमान ह्याङ्गर, ड्रोन भण्डार र सञ्चालन केन्द्रहरूलाई ध्वस्त पारिएको दाबी अमेरिकाको छ।
उता इरानी अधिकारीहरूले पनि देशका चाबहार, कोनारक, तब्रिज, बेहबहान र ओमिदिएह क्षेत्रमा एकसाथ हमला भएको पुष्टि गरेका छन्।
यसैबिच, अमेरिकी राष्ट्रपति डोनाल्ड ट्रम्पले इरानको शङ्कास्पद आणविक स्थल ‘पिकाक्स माउन्टेन’ मा चाँडै नै अझ ठुलो र भीषण आक्रमण हुन सक्ने चेतावनी दिनुभएको छ। अमेरिकी आक्रमण नरोकिए मध्यपूर्वमा युद्ध अझ भयानक रूपमा चर्किने चेतावनी इरानले दिएको छ। लगातारको यो द्वन्द्वले गर्दा यस क्षेत्रमा तनाव चरम सीमामा पुगेको छ।
