उत्तरी पेरुको पहाडी क्षेत्रमा यात्रुवाहक भ्यान सडकबाट तल खोलामा खस्दा कम्तीमा १४ जनाको मृत्यु भएको छ भने पाँच जना घाइते भएका छन् । दुर्घटनापछि उद्धार टोलीले कठिन परिस्थितिमा उद्धार तथा शव निकाल्ने कार्य जारी राखेको अधिकारीहरूले बताएका छन् ।
काजामार्का क्षेत्रअन्तर्गत राजधानी लिमाबाट करिब ८०० किलोमिटर उत्तरमा रहेको सान जुआन नगरपालिकाका संस्थागत सञ्चार प्रमुख रिकार्डो चिलोनका अनुसार दुर्घटनामा चालक र एक बालकसहित १४ जनाको मृत्यु भएको पुष्टि भएको छ । घाइते पाँच जनाको स्थानीय अस्पतालमा उपचार भइरहेको उहाँले जानकारी दिनुभयो ।
दुर्घटनापछि प्रहरी, अग्निनियन्त्रक र उद्धारकर्मीहरू तत्काल घटनास्थलमा पुगेका थिए । दुर्घटनामा परेको भ्यानमा सान जुआन जिल्लाबाट सियुडाड डे डिओसतर्फ गइरहेका १९ जना यात्रु सवार थिए ।
अग्निशमन विभागका अधिकारी एडसन रोमनले दुर्घटनास्थलमा उद्धार कार्य अत्यन्त कठिन भइरहेको बताउनुभयो । उहाँका अनुसार दुर्घटनाग्रस्त भ्यान खोलाभित्र अड्किएकाले अझै छ जनाको शव बाहिर निकाल्न बाँकी छ ।
दुर्घटनाको कारणबारे अनुसन्धान सुरु गरिएको छ । पेरुमा जीर्ण सडक, ट्राफिक नियमको कमजोर कार्यान्वयन तथा मानवीय त्रुटिका कारण यस्ता सडक दुर्घटना बारम्बार हुने गरेका छन् ।
आधिकारिक तथ्याङ्कअनुसार गत वर्ष मात्र पेरुमा सडक दुर्घटनाका कारण तीन हजारभन्दा बढी मानिसको मृत्यु भएको थियो ।
