तेहरान – इरानको ‘इस्लामिक रिभोल्युसन गार्ड्स कर्प्स’ (IRGC) ले आफ्नो एरोस्पेस फोर्सले जोर्डनस्थित अमेरिकी सैन्य बेसमा आक्रमण गरेको जनाएको छ। ‘अपरेशन नसर-२’ को छैटौँ चरण अन्तर्गत गरिएको उक्त आक्रमणमा अमेरिकी एफ-१५ (F-15), एफ-१६ (F-16) र एफ-३५ (F-35) लडाकु विमानहरू राखिएका ह्याङ्गरहरू (विमान राख्ने घर) ध्वस्त पारिएको र कयौँ एमक्यु-९ (MQ-9) रणनीतिक ड्रोनहरू नष्ट गरिएको आईआरजिसीले दाबी गरेको छ।
बुधवार बिहान जारी गरिएको एक विज्ञप्तिमा आईआरजिसीले इरानविरुद्ध अमेरिकाले गरेको पछिल्लो सैन्य आक्रामक कदमको जवाफमा यो कारबाही गरिएको स्पष्ट पारेको छ। उक्त अपरेशनले जोर्डनको ‘अल-अजराक’ (Al-Azraq) मा रहेको अमेरिकी सैन्य अखडालाई निसाना बनाएको थियो।
विज्ञप्तिका अनुसार, उक्त सैन्य बेसमा तैनाथ गरिएका अत्याधुनिक अमेरिकी लडाकु विमान र ड्रोनहरूलाई लक्षित गरी गरिएको यो आक्रमण निकै घातक रहेको थियो।
जोर्डनी नागरिकलाई आह्वान
जोर्डनका जनतालाई सम्बोधन गर्दै आईआरजिसीले यस अरब राष्ट्रलाई ‘पैगम्बरहरू (सन्तहरू) सँग जोडिएको एक पवित्र भूमि’ को रूपमा वर्णन गरेको छ। यो पवित्र भूमिमा कब्जाकारी र अन्तर्राष्ट्रिय अपराधीहरूलाई ठाउँ दिन नहुने इरानको भनाइ छ।
विज्ञप्तिमा भनिएको छ, “प्यालेस्टाइनी जनतामाथि अमेरिका र इजरायलले गरेको अत्याचारलाई जोर्डनी जनताले अरू कुनै पनि राष्ट्रले भन्दा नजिकबाट नियालेका छन्। त्यसैले आफ्नो भूमिबाट अमेरिकी सेनाको उपस्थिति अन्त्य गर्न र इस्लामिक देशहरू तथा प्यालेस्टाइनविरुद्ध हुने आक्रमणका लागि जोर्डनको भूमिलाई प्रयोग हुन नदिन जोर्डनी नागरिकहरूले काम गर्नुपर्छ।”
आईआरजिसीले जोर्डनका जनतालाई हरेक अवसरको सदुपयोग गर्दै आफ्नो देशबाट अमेरिकी संस्थाहरूलाई हटाउन र अमेरिकी सेनालाई धपाउन समेत आह्वान गरेको छ।
