काठमाडौँ, २८ असार । अमेरिकाले शनिबार राति इरानका विभिन्न सैन्य ठेगानाहरूलाई लक्षित गरी शक्तिशाली हवाई आक्रमण (एयरस्ट्राइक) गरेको छ। अमेरिकी केन्द्रीय कमाण्ड (सेन्टकम) का अनुसार इरानको आणविक सहर बुशेहरसहित असालुयेह, बन्दर–ए–देयर, जास्क र चाबहारमा रहेका सैन्य अखडाहरूलाई निशाना बनाइएको हो। इरानी सञ्चारमाध्यमहरूले पनि यी क्षेत्रहरूमा ठूला विस्फोटनहरू भएको पुष्टि गरेका छन्।
विश्वकै महत्त्वपूर्ण व्यापारिक जलमार्ग ‘स्ट्रेट अफ होर्मुज’ मा साइप्रसको झण्डा अंकित एक व्यावसायिक कन्टेनर जहाजमाथि इरानले आक्रमण गरेपछि त्यसको जवाफमा यो कारबाही गरिएको अमेरिकाले जनाएको छ। सेन्टकमका अनुसार इरानी आक्रमणका कारण उक्त जहाजमा आगलागी हुनुका साथै इन्जिनमा गम्भीर क्षति पुगेको छ भने चालक दलका एक सदस्य अझै बेपत्ता छन्।
यता, अमेरिकी आक्रमणपछि इरानले कडा जवाफी कारबाहीको चेतावनी दिएको छ। इरानी विदेश मन्त्रालयका सल्लाहकार अली सफारीले अमेरिकी हमलाको उचित जवाफ दिइने स्पष्ट पारेका छन्। यसैबीच, इरानले उक्त क्षेत्रमा अमेरिकी सैन्य हस्तक्षेप पूर्ण रूपमा अन्त्य नभएसम्मका लागि ‘स्ट्रेट अफ होर्मुज’ अनिश्चितकालका लागि बन्द रहने घोषणा समेत गरेको छ। यो घोषणासँगै खाडी क्षेत्रमा युद्धको खतरा थप चुलिएको छ।
